Ang Metropolitan Cebu Water District (MCWD) nihulagway nga managlahi ang pangangkon sa PrimeWater Infrastracture Corporation subay sa ilang pamahayag sa media ug sa ilang suwat ngadto sa water district niadtong Pebrero.
Kini ang padayag sa MCWD Cebu aron mahatagan og katin-awan ang pangangkon sa PrimeWater nga ang public-private partnerships sa ilang kompaniya naglambigit lamang sa hiniusang pagpalambo sa water distribution ug supply system pinaagi sa joint ventures.
Ang MCWD nagkanayon nga mahimong tinuod ang ilang pamahayag sa pagpakigtambayayong sa ubang water district apan ang ilang gipresentar ngadto sa MCWD mao ang kumpletong pagbalhin sa pagdumala, operasyon, pagsingil ug pagkolekta sa mga serbisyo sa tubig, nga mao ang kinauyokan sa ilang gimbuhaton.
Atol sa presentasyon atubangan sa Board of Directors (BOD), ang ilang representante nitumbok nga ang water district adunay lima lang ka gahom o functions nga naglangkob sa strategic planning, business policy setting, asset management supervision, taripa setting, performance review and monitoring, ug customer relations.
Apan ang BOD nga gipangulohan ni chairman Jose Daluz III nipasupot sa ilang kabalaka bahin sa legalidad sa sugyot, tungod kay kasagaran sa mga joint venture wala maglakip sa pagbalhin sa pagdumala o adlaw-adlaw nga operasyon ug pag-maintain sa water district.
Sa dihang gipangutana kabahin sa kasiguruhan sa trabaho sa mga empleyado, ang ilang representante niingon nga ang mga empleyado mahimong mopili nga magpabilin o dili ug dili usab mandatory alang sa kompaniya ang pag-absorb.
Gihisgutan usab nila ang retirement packages sa mga empleyado nga dili ma-absorb, ingon man ang pagbalhin sa mayoriya sa mga empleyado gikan sa serbisyo sa gobiyerno ngadto sa pribadong trabaho.
Niadtong Pebrero 22, 2023, ang BOD ug management sa MCWD nisulat ngadto sa PrimeWater ug pormal nga gibalibaran ang ilang tanyag alang sa joint venture. Ang MCWD nagkanayon nga adunay dili maayong record ang PrimeWater base sa ilang nakit-an lima na ka tuig ang nakalabay.
“It is important to note that the Commission on Audit (COA) has raised concerns about several joint venture agreements entered into by various local water districts with Prime Water Infrastructure Corp,” tipik sa pamahayag sa MCWD.
Gitumbok sa COA ang dakong pagkawala sa kita sa San Jose del Monte City Water District (SJDMC WD) human sa pagsulod sa usa ka joint venture tali sa PrimeWater niadtong 2018.
Niadtong 2017, ang water district nitaho og kita nga P126.477 milyunes. Apan, sa pagtapos sa 2018, o pito ka buwan sa joint venture agreement, nius-os og 58 porsiyento ang kita sa water district ngadto na lang sa P53.6 milyunes.
Niadtong 2019, nius-os pa kini ngadto sa P2.265 milyunes nga nagrepresentar sa 98 porsiyento nga pagkunhod kon itandi sa kita niadtong 2017, samtang ang Prime Water mikita og P180 milyunes matag tuig.
Sa kaso sa Marilao Water District sa Bulacan, ang 2019 report sa COA nagpatugbaw kon sa unsang paagi ang Primewater nakaangkon og P50.55 milyunes nga pagkawala sa tubig sa unang tuig sa operasyon niini sa distrito.
Dugang pa sa MCWD nga ang PrimeWater napakyas sa pag-remit sa mga koleksyon ug pagbayad sa buhis sa prangkisa.
Niadtong 2021, ang COA adunay mga pangutana mahitungod sa 38 ka joint ventures nga gipirmahan sa lainlaing lokal nga water districts uban sa Primewater, gikan sa Aparri, Cagayan sa amihanan ngadto sa Zamboanga City sa Mindanao.
Gi-report sa mga auditor sa gobiyerno nga kini nga mga deal wala nagsunod sa mga pamaagi nga gitakda sa National Economic and Development Authority (NEDA) alang sa mga kasabutan sa joint venture.