Bisitahon ni Cebu Governor Gwendolyn Garcia ang lungsod sa Oslob aron masuta ang sitwasyon sa whale shark watching activity sa lugar.
Kini human nagpakitabang si Oslob Mayor Ronald Guaren sa buhatan sa gobernador aron pagpalambo sa tourist experience sa lungsod.
Matod sa Provincial Information Office (PIO), gisugyot ni Garcia nga magpabutang og mas nindot nga tourist area diin ipahigayon ang orientation activities alang sa mga buot makasinati sa whale shark watching.
Tumong ini aron mapahimutang ang kapalitan sa souvenirs ug uban pang lokal nga mga produkto sa lungsod.
Gikan sa maong dapit, gusto sa gobernador nga pasakyon na og bus ang mga turista paingon sa whale shark watching spot.
Subay niini, gikatakda nga mangita og lugar ang mayor nga kahimoan sa maong plano.
Base sa datos sa kagamhanan, anaa sa di mominus 1,000 ka mga turista ang gidaghanon sa mga mobisita sa lungsod matag adlaw.
Matag turista nagbayad og P500 fee aron makalantaw ug makasinati sa paglangoylangoy kauban ang mga Butanding.
Gawas sa pagbisita sa lugar, tagbuon usab ni Garcia ang mga nanag-iya sa resort nga nahimutang sa Sumilon island.
Ang maong lugar usa sab sa mga tourist attraction sa lungsod nga gusto usab nga palambuon pa sa kagamhanan.