MAASIN, Southern Leyte - Dakong kalamboan sa lalawigan sa Southern Leyte ang nakita ni Gobernador Damian Mercado sa pagbahin niini sa duha ka distrito.
Sa kasamtangan, usa pa ang distrito sa Southern Leyte diin ang lalawigan gilangkoban sa 500 ka barangay.
Alang sa gobernador, dali na usab kaayo mahibaw-an ang mga panginahanglan sa mga lumulupyo sa matag barangay.
Matod ni Gob. Mercado, siya mismo ang author sa maong balaud nga bahinon sa duha ang Southern Leyte niadtong kongresista pa siya.
"Ang akong explanatory note mao ni, nga ang among probinsya is composed of 500 barangays ug mo suroy ko one day per barangay, more than one year una nako masuroy. Unfair sa among mga constituents nga di nako masuroy," matod ni Gob. Mercado.
Dugang ni Gob. Mercado, dako usab nga epekto sa pagbahin ang dugang pundo nga ihatag sa national government gumikan sa nadugang nga distrito.
"Ang ako gyud gihuna-huna, personally, nga kon maduha ang distrito, maka-additional ta og budget nga mosud sa atong probinsya. Kay ang atong probinsya nagkinahanglan pa gyud og suporta sa national government," pasabot ni Gob. Mercado.
Apan duna'y ubang kritiko ni Gob. Mercado nga nagduda nga paagi kini aron laing Mercado na usab ang mabutang sa kongreso.
Apan alang sa gobernador, gilauman na niya nga sa tanan lakang sa gobyerno aduna gyud mosuway bisan unsa ka maayo ang lakang.
"I dont know og mao na ila huna-huna basta ang ako gihuna-huna nga ma dugangan ang pundo. Kon duna'y dakong pundo duna'y mga proyekto ug mo sunod ang dakong paglambo sa probinsya," matod ni Gob. Mercado.
Prayoridad sa probinsya ang mga karsada ug turismo.
"Duna na usab bag-ong engineering office nga matukod. So, mas mapadali ang proyekto sa karsada ug daghan na usab ang mahatagan og trabaho," matod sa gobernador.
Base Republic Act 11198 nga gipirmahan ni Presidente Rodrigo Duterte, sakop sa First District sa Southern Leyte ang mga lungsod sa Maasin, Macrohon, Padre Burgos, Limasawa, Malitbog, Tomas Oppus ug Bontoc.
Samtang sa Second District mao ang mga lungsod sa Sogod, Libagon, Liloan, San Francisco, Pintuyan, San Ricardo, St. Bernard, Anahawan, San Juan, Hinundayan, Hinunangan ug Silago.
Sa pagka karon, naa sa dul-an P2 bilyon ang Internal Revenue Allotment sa lalawigan, lakip na niini ang income sa mga barangay.