Ang Cebu City Government adunay nagpadayon nga proyekto nga gitawag og Spaghetti Wires Eradication Project nga nagsugod pipila ka tuig na ang milabay.
Kini nga programa nagtumong sa pagmentinar sa lainlaing mga lugar nga adunay mga low-hanging ug overhead wires.
Ang mga wire nga spaghetti mao ang nagkadaiyang cords nga naglambod samtang nagkutay sa mga poste.
Ang paghawan niini nagkinahanglan og taas nga panahon.
Sigon sa pakighinabi sa telepono kang Cebu City Councilor Jerry Guardo, iyang gipadayag nga padayon ang ilang operasyon ug gitubag ang mga hangyo sa lainlaing mga barangay nga dunay spaghetti wires. Mokabat sa 80 porsiyento ang ilang nahuman sa mao nga programa.
Siya namahayag nga sila motubag sumala sa hangyo ug diha-diha dayon ilabi na sa mga kritikal nga sitwasyon. Sa average nga adlaw, makakuha sila og 50 ka kilo nga dead wire, gikan sa Lunes hangtod Biyernes.
Matod niya nga ang mga lugar nga hawanan gikan sa spaghetti wires nagdepende sa dapit apan gibuhat sa naandan nga schedule. Siya niingon nga ang ilang team gilangkuban sa lainlaing mga telecom.
Gipasabot niya nga gitrabaho nila kini matag adlaw, nga naghatag og mga iskedyul depende sa prayoridad. Apan bisan pa niana, siya nipadayag nga sila nitubag diha-diha dayon. (Kyle Andrei D. Acuña, NWSSU Intern)