LOVE triangle ang usa sa mga anggulo sa pagpusil patay sa pulis nga sakop sa Mobile Patrol Group (MPG) sa Cebu City Police Office sa Barangay Dumlog, Siyudad sa Talisay, pasado alas 10 Sabado sa buntag, Marso 21, 2020.
Ang pulis sakay sa iyang motorsiklo aron mo duty dihang gipusil makadaghan sa nag-inusarang gunman.
Ang biktima gila nga si Police Corporal Marlon Belleres, 29, taga Phase 2 Deca Homes, Barangay Dumlog, Siyudad sa Talisay.
Matod ni Police Major Gerard Ace Pelare, hepe sa kapulisan sa Dakbayan sa Talisay, padulong na motrabaho si Belleres.
Pag-abot sa may seawall sa Barangay Dumlog, iyang nakasugat ang nagbinugtong nga gunman nga sakay usa sa usa ka motorsiklo kalit nga ni-u-turn ug dayong pusil sa biktima makaunom ka mga higayon.
Sa unom ka mga buto nga nadungog sa mga saksi, tulo niigo sa liog ug abaga ni Belleres hinungdan sa iyang hina-nali nga kamatayon.
Sa paghiling sa lawas ni Belleres, wa na ang iyang cellular phone nga gituohan nga gikuha sa mga estambay sa dapit.
Ila pang gisubay kon kinsa ang nag kuha.
Human sa pagpamusil, ang gunman dali nga nisibat sa wa matino nga direksyon.
May kasuko?
Gitan-aw nila ang love triangle nga anggulo ug personal nga atraso human masuta sa ilang imbestigasyon nga daghan og uyab si Belleres.
Ilang pagduda nga adunay kasuko ang gunman kang Belleres tungod kay siya na mismo ang nangunay sa pagpusil.
“Lone gunman. Mao nang indicative siya nga suko ba kay usually kay kon gun-for hire duha man gyud na. Kato siya murag nangunay gyud. So, it’s either love triangle or personal grudge,” matod ni Pelare.
Dali gipatawag ni Pelare ang mga babaye nga nalambigit sa maong police aron masayran kung aduna bay panag away tali nila. Apan giklaro ni Pelare nga ang mga uyab ni Belleres nga dili sila matawag nga suspek sanglit igo lang sila nga gipangutana.
Adunay naka kita sa pagpamusil, apan dili nila kini mailhan tungod kay naka full-face helmet ang gunman.
Gisusi nila ang close circuit television (CCTV) camera sa dapit, lakip na sa balay ni Belleres.
Ilang nakita nga sa sulod pa lang sa subdivision diin nagpuyo ang pulis, nagtuyoktuyok na ang gunman.
Maklaro nga nangita kini kon asa ang balay ni Belleres.
“Sa CCTV, makita nga minutes before nagtuyoktuyok siya sa balay, naay description 5’6 ang height dayon naka helmet man, full face helmet,” dugang ni Pelare.
SITG
Magtukod sila og special investigation task group alang na sa dinalian nga pagsulbad sa kamatayon ni Belleres.
Niabag na sa imbestigasyon ang Regional Special Operations Group 7 lakip na ang Criminal Investigation and Detection Group 7.
Ang bag-ong milingkod nga hepe sa Cebu City Police Office nga si Police Colonel Hector Grijaldo makig-alayon sa kapulisan sa siyudad sa Talisay tungod kay ila kining sakop.
Matod niya nga buotan nga pagkapulis si Belleres bisan kon bag-o pa siya nga hepe sa kapulisan sa siyudad sa Sugbo.
“Based on the information gathered on the chief of the Mobile Patrol Group that this person is a good person,” matod ni Grijaldo.
Dugang ni Grijaldo nga ang pagkawagtang sa cellphone dako og posibilidad nga gituyo sa killer aron paglihay sa imbestigasyon nga motumbok kaniya.