Gusto sa Talisay City Government nga magbutang og e-learning centers sa iyang tanang barangay.
Si Mayor Gerald Anthony “Samsam” Gullas niingon nga natukod na ang e-learning center sa Barangay Bulacao, samtang ang laing usa gipaubos sa konstruksyon kilid sa barangay gymnasium sa Tabunok.
“We continue to do that because we want to put learning centers closer. Ga hinay-hinay lang ta kay wala may klase pag pandemic,” matod ni Gullas.
Dugang pa niya nga karon na ang saktong panahon nga paspasan ang proyekto sanglit nagsugod na ang face-to-face nga klase.
Ang sentro sa pagkat-on sa electronic gidisenyo alang sa mga estudyante sa elementarya ug hayskul nga mag research alang sa ilang mga buluhaton sa eskuylahan.
Libre ang paggamit sa center. “Butangan na dinha og computers nga naay internet. Mao nay importante,” matod ni Gullas.
Matod ni Gullas nga gusto niya nga ang tanang barangay adunay kaugalingong e-learning center ilabi na sa kabukiran diin kuwang ang signal sa wi-fi. Adunay 22 ka barangays sa dakbayan sa Talisay.
Matod niya nga ilang hatagan og prayoridad ang mga barangay nga adunay magamit nga luna alang sa katukoran sa e-learning center.
Si Gullas nipahibawo nga ang maong programa gipundohan sa Talisay City Government, apan siya nidugang nga ila usab nga i-welcome ang mga negosyante sa dakbayan nga gustong motabang. (BBT)