Suspetsadong gunman ug drayber sa motorsiklo nga gihimong get away vehicle nasikop sa alas 10 sa gabii sa Miyerkules, Mayo 3, 2023 sa lungsod sa Loay, Probinsiya sa Bohol atol sa hot pursuit sa kapulisan pipila ka mga oras human sa pagpamusil.
Si Police Staff Sergeant Mc Murphy Galapin sa Loay Police Station niila sa mga suspek nga sila si Clark Cimafranca, 23, taga Barangay Tiptip, dakbayan sa Tagbilaran ug Mike Arong, 18.
Matod ni Mc Murphy, si Cimafranca giingong maoy gunman samtang si Arong maoy drayber sa motorsiklo.
Dugang ni Mc Murphy nga si Cimafranca nadakpan sa nasudnong dalan sa Barangay Sagnap sa Loay uban sa motorsiklo nga naputol ang kadena.
Si Arong na-hold sa Tagbilaran Police Station dihang nagpa-blotter human nagpakaaron-ingnon nga ang iyang motorsiklo gikarnap sa Loay.
Ang pagpamusil nahitabo pasado alas 7:00 sa gabii sa sa Miyerkules, kansang mga biktima giila nga sila si Hermes Barete, 36, ug kapuyo nga si Razil Cagabcab, 40, sa Barangay Villalimpia.
Narekober sa Loay police ang usa ka kalibre .45 nga pistola ug duha ka mga magazine.