Gusto ni Governor Gwendolyn ‘Gwen’ Garcia nga i-harmonize ang duha ka mga nabantog nga destinasyon sa probinsya alang sa tourism adventures sa lalawigan sa Sugbo.
Ang lokal nga Kagamhanan sa Lungsod sa Alegria ug Badian nagkasabot nga magduyog sa canyoneering activities niini.
Sa ingon, ang mga turista nga mag-canyoneering sa Badian mahimo nang molabang sa silingang lungsod sa Alegria aron masaksihan usab ang samang water activity sa lugar.
Si Earl Vincent Endab, Badian Tourism Officer, nagkanayon nga paagi kini sa Kapitolyo ug sa LGUs nga pangandaman ang pagdagsa sa dugang pang mga turista.
Iyang gidugang nga ang maong paagi mas makapalingaw sa mga turista ilabi na nga ang gikan sa canyoneering sa Alegria mahimong mogawas sa Badian sanglit nagsunod lang ang maong mga lungsod.
“This will open a package wherein ang mosud sa Alegria maka-exit sa Badian,” matud ni Endab sa Superbalita Cebu sa Marso 2, 2023.
Atol sa tigom nila ni Badian Mayor Carmencita Lumain ug Alegria Mayor Gilberto Magallon, pinangulohan ni Cebu Governor Gwendolyn Garcia, nasabutan nga molagda kini og kasabutan karong Marso 21, 2023 alang sa naasoyng katuyoan.
Ang canyoneering activities ipaubos sa packages nga sa kasamtangan, gihan-ay pa sa duha ka mga LGUs alang sa hingpit nga pagpatuman niini.
Sa nahitabong tigom ni Garcia, iyang gisubli ang paghatag og gibug-aton sa padayong pagbanhaw sa tourism economy sa lalawigan aron makabenepisyo ang mga konstituente niini.