KAPIN sa dos mil ka mga drayber sa habalhabal sa dakbayan sa Sugbo ang ningtambong sa tigom sa Cebu City Sports Center (CCSC) kagahapon sa hapon, Enero 5.
Ang maong tigom gitambongan usab ni Cebu City Mayor Edgardo Labella uban nila ni kanhi Cebu City Councilor Jun Alcover, Lemar Alcover, Konsehal Joel Garganera, Ernest Herrera, Richie Wagas ug cooperative consultant Elias Baquero
Nag-unang tumong sa naasoy nga tigom mao ang pagpahibawo ni Labella bahin sa iyang gilagdaan nga Executive Order (EO) 36 nga nagtukod sa buhatan sa Cebu City Motor Riders Community Welfare Office (CCMRCWO) sa 9th Floor sa Cebu City Hall.
Lakip sa katuyoan mao ang pagtukod og kooperatiba sa mga drayber sa habalhabal.
Ang EO 36 nga gipirmahan ni Labella niadtong Disyember 23, 2019 nga nagpatukod sa CCMRCWO alang lang sa mga drayber sa habalhabl nga taga dakbayan nga rehistrado sa Commission on Elections (Comelec) ug Land Transportation Office (LTO).
Si kanhi kongresista ug konsehal nga si Alcover nipasabot nga iya kining adbokasiya sa pagtabang sa mga drayber sa habalhabal alang sa kahiusahan ug paghatag maayong ugma.
Nasugdan kini ni Alcover niadtong 2010 dihang kongresista sa ANAD Partylist ug niduso siya sa House Bill 6046 apan gumikan sa kuwang nga pagsabot ug wala mahatagi og prayoridad sa ubang congressmen.
Dihang nagsilbi nga city councilor si Alcover sa Cebu City, iyang gipaningkamotan nga mapalabang ang balaudnon apan, gumikan kay nasakop sila sa minority sa konseho sa kanhi administrasyon ni kanhi Cebu City mayor Tomas Osmeña, nausik ang pagduso sa gipangamahanang ordinansahon.
Matod ni Alcover, luoy ang mga habalhabal drayber nga daling pangwartahan sa ubang enforcer, dunay ubang traffic enforcer o law enforcer nga sa habalhabal drivers mangwarta.
Dugang ni Alcover, “Almost 40 katuig nga illegal dinhi sa nasod apan gumikan kay wala moaksyon ang gobyerno. Illegal apan gidawat sa katawhan, sama sa mga dapit nga walay dagkong karsada o sakyanan nga makaadto. Midaghan ang habalhabal. Ilegal apan makatabang sa nagkinahanglan. Dakog ikatabang sa komunidad.”
Ang Cebu City dunay gibanabana nga 15 mil ka mga drayber sa habalhabal apan katunga lang ang dunay lisensya ug legal nga papeles sa ilang motorsiklo sa LTO.
Pinaagi sa tabang sa CCMRCWO adunay kadangpan ang mga dryaber, moatiman kanila nga walay lisensya ug walay rehistro, tabangan aron dili madakpan sa LTO.
Dason ni Alcover, legal na nga magdagan ug luwas nga magdagan sa kadalanan human bansayon ang mga drayber bahin sa disiplina sa pagmaneho ug pagtuman sa balaud sa kadalanan.
Gawas niini, mapalambo ang ilang kinitaan pinaagi sa pag-apil sa kooperatiba.
Dunay daghan requirements sama sa barangay clearance, police clearance ug dunay disciplinary action alang sa sa kalusawan sa pasahero.
Labaw sa tanan, tukion sa CCMRCWO ang tukma nga taripa aron walay reklamo sa pletihan ug mag-uniporme ang drayber aron mailhan lakip sa iyang rota.
“Makasulbad sa abuso, kriminalidad, dunay training sa traffic magamit sa auxilliary sa traffic sa mga kalihokan sama sa Sinulog. Dunay tukoron nga habalhabal firefighters kay ang habalhabal makasulod sa gagmayng lugar, makahatag og first aid kay sila ang una makakita dayon og dunay disgrasya...” kabahin kini sa mas lapad nga plano sa CCMRCWO, sumala ni Alcover.
Samtang, ang pagpahimo og public utility transportation sa sakyanan nga duha lang ang ligid sama sa motorsiklo nga gidili sa nasudnong balaud, apan dunay paningkamot nga maamendar kini nga gipangunahan sa Angkas ug ubang motorcycle hailing app.
Usa usab kini nga tukion sa sa CCMRCWO isip tabang sa mga drayber. (B)