Mahimo nang makapanginabuhi balik ang mga habalhabal drayber sa Dakbayan sa Lapu-Lapu nga usa sa mga sektor nga labing naapektohan sa nasinati nga pandemiya.
Kini human nakig-alayon ang online delivery platform nga Happy Move sa lokal nga Kagamhanan sa Dakbayan aron pag-imbitar sa mga habalhabal driver nga moapil sa ilang grupo.
Gipatawag sa City Hall ang tanang presidente sa mga grupo sa habalbal drivers sa Lapu-Lapu kagahapon sa buntag, Lunes, Enero 11, 2021 aron hisgutan ang alternatibong panginabuhian.
Matod ni Ricson John Baladjay, Cebu operations manager sa Happy Move, nga gitugotan sila sa Land Transportation Franchising and Regulatory Board (LTFRB) nga makakuha og 4,500 ka drivers ug riders kauban na ang sister company nila nga Joyride ug MC Taxi. Sa karon, aduna pay 1,100 nga mga miyembro ang maong kompanya.
“Gusto mi nga makatabang pud sa government ni Mayor Ahong nga makahatag mi og alternative nga panginabuhian sa mga habalhabal driver. Which is ang ila man gud karon is pamasahero raman. So ang amo is gusto namo sila kuhaon pud nga makatabang mi nila nga maka-deliver pud sila sa mga items nga i-booking nila diri sa Lapu-Lapu,” matod ni Baladjay.
Sigon ni Baladjay nga gikinahanglan lang nga mo-apply ang mga habalhabal driver.
Andamon ang mga rekisitos sama sa original receipt ug certificate of registration sa ilang motorsiklo, professional driver’s license, ug National Bureau of Investigation o barangay clearance. Dawaton usab sa kompaniya ang tanang brand sa motorsiklo nga nigawas gikan 2010.
“Para sa security sad sa among client nga legitimate gayud sila nga delivery namo. So, pa-applayon na sila namo online unya i-process namo ilang documents, tan-awon namo,” matod ni Baladjay.
Matod ni Baladjay nga posibleng mokita ang mga rider og P500-P600 matag adlaw kon himuon nga sideline ang online delivery. Apan kon himuong full-time nga trabaho, posibleng moabot sa P1,500 ang kitaon matag adlaw.
Gikalipay ni Wilfredo Patalinjug, presidente sa Lapu-Lapu City Public Market Riders, ang maong kahigayonan.
“Dako kaayo namong kalipay nga adunay tawo nga nag-agak para nga dili mi mahimong supak sa balaod. Kay kaning habalhabal ila man gayud ning giingon nga walay franchise ug illegal. Mao nang nalipay pud ming dako pud kauban sa mga presidente sa kada grupo,” matod ni Patalinjug.
Nagkanayon si Mayor Junard “Ahong” Chan nga dako og ikatabang ang oportunidad ug giasoy nga andam ang lokal nga kagamhanan nga mohatag og tabang sa mga habalhabal driver.
“If you need assistance from the local government, you can use our sports complex para maoy inyohang meeting place, adto mo didto mag-registration,” matod ni Chan.