Sa Marso mapahimuslan na sa dialysis patients nga taga dakbayan sa Danao ang 15-unit hemodialysis center nga mahimutang sa ilang provincial hospital.
Atol sa pakigtagbo ni Cebu Governor Gwendolyn Garcia sa mga sakop sa Medtronix Medical Supplies and Equipment, gitug-an ni Jona Navarro, proprietor sa Medtronix, nga anaa na sa 65 porsiyento nga katukoran og retroffitting sa center.
Dugang niya nga gawas sa dakbayan sa Danao, mosunod usab pagbukas ang dialysis center sa dakbayan sa Carcar subay sa nagpadayon niining construction.
Base sa taho sa Cebu Provincial Information Office pinaagi sa media arm niining Sugbo News, gipahibawo ni Dr. Rannie Gravador nga kasamtangang adunay 100 ka mga kidney failure patients nga naghuwat usab nga matambalan sa ten-unit dialysis center sa Balamban Provincial Hospital.
Kahinumdoman nga ang Kapitolyo nilagda og kasabutan tali sa Medtronix alang sa pagbutang og dialysis center ug support system sama sa direct feed reverse osmosis machines, water pre-treatment system ug 15 ka recliner chairs ug uban pa.
Subay niini, gitahasan sab sa gobernador ang maong kompaniya sa pagsusi sa uban pang mga hospital nga gidumala sa probinsya sa Sugbo sama sa isla sa Bantayan ug Camotes aron mabutangan og dialysis center.
Sa maong paagi, dili na kinahanglan pang molabang ang mga pasyente sa mainland Cebu aron lang makapatambal.