SA IKADUHA nga higayon, ang Hino Motors ang gideklara nga lowest bidder atol sa public bidding sa P232.5 milyones para pagpalit og garbage compactor truck sa dakbayan sa Sugbo.
Si Ronald Malacora, chairman sa Bids and Awards Committee (BAC) nagkanayon gikauban sa Hino ang RDAK Transport Equipment Inc, Civic Merchandising Inc ug kompaniya nga nagbase sa Davao City atol sa subasta kagahapon didto sa City Hall.
Sa upat, walay na-disqualify apan ang Hino nga maoy gideklara sa BAC nga winning bidder human sa makuti nga post qualification (postqua) sa technical working group (TWG) niadtong Enero 20, ning tuiga maoy adunay labing ubos nga amount nga gitanyag atol sa bidding.
Hinuon si Malacora wala mobutyag kon pila ang bid amount sa Hino Motors apan ang chairman sa BAC niingon nga ubos pa sa unang bid amount sa Hino ang ilang gihatag nga presyo diin mapun-an ang savings sa Cebu City.
Ang P232.5 milyones gibahin sa duha ka public bidding diin ang Hino dili na ipaubos sa post-qua sanglit nahuman ang TWG sa unang bidding.
Una ang pagpalit sa 12 ka eight cubic meter garbage compactor truck balor og P120 milyones ug laing siyam ka twelve-cubic meter nga garbage compactor truck nga nagkantidad og P112.5 milyones.
Niadtong Enero 20 , ang Hino ni bid og P80 milyones para sa P112.5 milyones nga approved budget contract (ABC) ug P89 milyones sa P120 milyones nga ABC diin ang siyudad nakadaginot og P63 milyones sa maong transaksyon.
Gumikan niini, sila si Konsehal Joel Garganera ug Raymond Garcia, mga kaalyado sa opisisyon, nakadayeg sa resulta sa public bidding,]
Sila mipadayag nga kon kini pa maoy gisunod sa niaging mga bidding sama sa paghakot sa basura, dako na gyud unta og natigom ang siyudad nga mahimong gamiton unta sa uban nga basic services.
Ang maong mga compactor truck mao nay gamiton sa Cebu City sugod karonb bulan sa Hulyo 1.
Sa samang higayon, moundang na unya sa pagpangabang ang City Government og mga garbage truck nga maoy gipatuman gikan sukad pa niadtong Hulyo 2016. (PAC)