Namatay ang gituohang hitman ni suspended Negros Oriental Representative Arnolfo Teves human nisukol sa mga polis nga mi serve sa warrant of arrest nga giluwatan sa korte sa Barangay Malabugas, dakbayan sa Bayawan, Negros Oriental.
Ang namatay giila nga si Alex Manegos Mayagma, hingkod, taga Barangay Minaba, Bayawan City.
Si Mayagma anaa sa Top 1 most wanted person sa Central Visayas ug adunay upat ka mga kasong murder nga gisang-at sa korte.
Tulo sa upat ka mga kaso na-serve niini mao ang kasong murder ug duha ka mga kaso sa kalapasan sa Republic Act 10591 kun Illegal Possession of Firearms ug kalapasan sa Comelec Gun Ban.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, pangulo sa Police Regional Office 7, nga sa dihang i-serve na unta ang warrant, mikuha kini sa iyang armas ug gition sa usa ka polis nga niresulta sa pag-inilugay.
Sa dihang padung na nga dalhon ngadto sa kampo, ang akusado nikuot pa sa iyang bag diin didto ang laing armas nga gisuksok ug buot unta nga mamusil sa mga polis hinungdan nga midepensa na ang mga police personnel pinaagi sa pagpusil kaniya.
Gidali pa pagdala si Mayagma sa duol nga tambalanan apan gideklarar nga dead on arrival.
Base sa record sa kapulisan, si Mayagma giingong nalambigit sa daghang mga patay sa maong probinsya sa nanglabay nga katuigan ug ning bag-o lang.
Dugang ni Pelare nga tawo sa mga Teves si Mayagma samtang ang manukan diin didto gidakop ang suspek gipanag iya matod pa ni Teves apan subject for confirmation ang maong inpormasyon. (AYB)