Ang Crime Against Person unit kun Homicide section ug ang Crime Against Property unit nga naila kaniadto nga Theft and Robbery Section (TRS) gitinguha nga ibalik sa hepe sa Cebu City Police Office (CCPO) aron motutok sa mga krimen sa dakbayan sa Sugbo.
Matod ni Police Colonel Ireneo Dalogdog, hepe sa CCPO, kinahanglan na nga ibalik ang maong duha ka units aron motutok sa mga kaso sa pusil, dunggab ug uban pa.
Samtang, dugang ni Dalogdog, ang TRS maoy maoy moimbestigar sa mga kaso sa kawat, tulis ug pagpanglungkab.
Giangkon niya nga tungod sa kadaghan sa mga gimbuhaton sa 11 ka police stations, dili na makatutok sa ilang trabaho nga mao ang pagsulbad sa ubang krimen sama sa patay ug uban pa nga tungod niini angay nga dunay unit nga motutok niini.
Dili sayon ang pagbutang og mga personnel sa duha ka units tungod kay kinahanglan nga ang madestino niini dunay background sa investigation.
Tungod niini, mokuha sila og tagduha ngadto sa tulo ka personnel sa matag police station nga maoy maglangkob sa Homicide ug TRS.
“Kinanglan nga ang ma assigned diri kadtong dunay background sa investigation kay siyempre Homicide theft and robbery dapat kabalo sila pag-abot sa investigation,” matod ni Dalogdog.
Gusto sa CCPO nga tarong nga mga personnel ang ibutang sa duha ka units tungod kay sila ang modakop ug mogukod niadtong nalambigit sa patay ug pusil sa dakbayan sa Sugbo.