NANGHATAG og buwak, balloons ug chocolates ngadto sa mga motorista ang mga personnel sa Highway Patrol Group (HPG) 7 sa dalan V. Rama, Brangay Calamba, siyudad sa Sugbo atol sa Valentine’s Day, Pebrero 14.
Nangatang ang mga sakop sa HPG-7 sa mga moagi nga mga sakyanan nga nagpatuo nga milusad silag checkpoint alang sa mga motorista nga adunay kalapasan sa balaod trapiko.
Apan sa dihang mapangutana kung kompleto ba sa mga papeles ang sakyanan diha pa sila mohatag og freebies.
Matod ni Police Captain Michael Gingoyon, nangulo sa maong kalihukan, nga usa kini ka paagi nga ilang isaulog ang Valentines Day uban ang mga nag manehog sakyanan.
Dili lang kada adlaw manakop sila sa drivers nga malapason sa balaod sa trapiko.
“In line of the spirit of Valentines day we are giving flowers, chocolates kanang mga balloons sad no para makita ug ma feel sa motorists nga kami mga highway patrol group sa pnp nga nag care ug nag love gyud sa ilaha isip law enforcer,” matod ni Gingoyon.
Apan daghan ang nakuyawan sa mga nag manehog motor nga miagi sa V. Rama sa pagtuo nga manakop kini.
Ang uban nga mga motor drivers nahadlok nga mo lahos ug nagpaabot nga mahuman ang gihimong checkpoint.
Usa si Boy de Leon nga taga Guadalupe ang wala mo agi tungod kay naka tsinelas lang nga nag drive sa iyang motor.
Samtang, ang ubang unit sa kapulisan sa siyudad sa Sugbo mihimo usab sa ilang pagsaulog sa Valentines sama nalang sa Traffic Police Group sa CCPO nga nagpahigayon og motorcade dungan sa pagpanghatag og buwak. (AYB)