Usa ka opisyal sa Housing and Urban Development Office (Hudo) sa Mandaue City nipaklaro nga ang tanang nasunogan sa Brgy. Looc i-accommodate ug ibalhin sa temporaryong pinuy-anan nga gigahin alang kanila sa Barangay Guizo taliwa sa mga taho nga ang mga benepisyaryo sa pabalay gipili lang ug gipili pinaagi sa raffle draw.
Si Atty. Johnbee Biton, pangulo sa Hudo, nitug-an sa mga tigbalita kaniadtong Martes, Marso 21, 2023, nga ang proseso sa pagpili sa mga nagpuyo sa temporaryong balay dili pinaagi sa raffle.
Dason niya, unahon nila ang mga senior citizen, lactating mothers, ug pipila ka mga opisyal sa homeowners associations nga mobalhin una.
Niadtong Sabado, Marso 18, 2023, ang 48 ka temporaryo nga housing units gi-turnover sa mga nasunogan sa Barangay Guizo.
Apan gipasalig ni Biton nga ang nahabilin nga 72 ka units ihatag usab sa dili pa matapos ang Marso.
Ang mga temporary shelter gidonar sa Mandaue Chamber of Commerce and Industry (MCCI) inabagan sa Mandaue City Government ug ubang stakeholders nga gituyo alang niadtong mga biktima sa sunog nga niigo sa Sitio Paradise sa Brgy. Looc niadtong Nobiyembre sa miaging tuig.
Sumala sa plano, dul-an sa 120 ka temporaryo nga housing units ang tukoron sa upat ka mga bloke, diin ang matag unit adunay gilapdon nga 20 ka square meters nga adunay suplay sa tubig ug kuryente.
Ang mga unit ibutang sa Barangay Guizo atbang sa Cebu International Convention Center (CICC) compound.
Sa sunog nga nahitabo niadtong Nobiyembre, di mominos 600 ka mga pamilya ang nawad-an og panimalay.
Una silang gipapuyo sa Looc gym, gibalhin sa Cesar M. Cabahug Elementary School, ug karon gibalhin sa Norkis Park atbang sa Mandaue City Comprehensive National High School.
Matod ni Biton nga ang gidaghanon sa mga nagpuyo sa dagkong modular tent sa Norkis Park nikunhod ngadto sa 140 samtang ang uban namauli sa ilang tagsa-tagsa ka mga probinsiya samtang ang uban nag-abang og mga balay sa ubang mga lugar.
Matod niya nga silang tanan, apil na ang mga nasunogan kaniadto ug informal settler families (ISF) nga naa sa CICC, ibalhin sa dili madugay sa permanenteng mga puy-anan samtang ang Siyudad nipirma og memorandum of understanding (MOU) uban sa Department of Human Settlements and Urban Development (DHSUD) sa pag-establisar og 14,000 ka affordable housing units alang sa mga kabos sa tibuok dakbayan sa Mandaue.