Mopasar og resolusyon ang Hunta Probinsyal aron mohangyo nga mahatagan og opisyal nga morepresentar sa Probinsya sa Toll Regulatory Council (TRC) sa Cebu–Cordova Link Expressway (CCLEX).
Kini human nasuta ni Cebu Governor Gwendolyn Garcia nga wa masangpit ang Kapitolyo sa pag-umol sa maong council bisan pa og nalakip sa mga lugar nga tadlasan sa CCLEX ang lungsod sa Cordova nga sakop sa Probinsya sa Sugbo.
Subay sa gipahigayong tigom sa Hunyo 29, 2023 kauban ang mga pangu sa Cebu-Cordova Link Expressway Corp. (CCLEC), gipasabot ni Garcia nga angay nga mahatagan og spot ang Kapitolyo nga makabaton og representante sa council sanglit sagad sa adlaw-adlaw nga moagi sa bridge mga konstituente sa probinsya.
Base sa joint venture agreement nga gihimo, nalakip sa nilagda niini ang Cebu City, Cordova, ug CCLEC.
Ang Probinsya wala malakip sa governing board sa bridge hinungdan nga walay representante sa TRC.
Subay sa taho sa Sugbo News, media platform sa Office of the Governor, nipadayag si CCLEC president ug general manager Allan Alfon nga andam siyang mohatag og duha ka seats sa TRC pinaagi sa pagduso sa gikinahanglang mga ammendment sa composition niini.
Sa kasamtangan, aduna la’y lima ka mga miyembro ang council. Lakip sa mga naapil ang tagsa ka representante gikan sa dakbayan sa Sugbo, lungsod sa Cordova, ug tulo ka appointed nga mga miyembro sa CCLEC.
“The Province, in this particular composition, was left out, forgetting the fact that perhaps 80 to 85 percent of those that use the bridge are coming not just from the City of Cebu and Municipality of Cordova,” matod ni Garcia sa samang taho.
Nalakip sa mga ningtambong sa maong tigom sila si Board Members Carmela Franco, Glenn Soco, ug Raul Bacaltos.