Ang Internal Affairs Service (IAS) sa Philippine National Police (PNP) nirekomendar sa pagtaktak sa serbisyo sa usa ka pulis nga nakuhaan og P13.6 milyunes nga kantidad sa methamphetamine hydrochloride (shabu) sa iyang lending firm nga buhatan sa Manila niadtong 2022.
Si IAS inspector general Alfegar Triambulo niingon nga si Police Master Sergeant Rodolfo Mayo Jr. napamatud-ang sad-an sa grave misconduct ug conduct unbecoming of a police officer.
Matud niya nga ilang gisumiter ang ilang rekomendasyon ngadto kang PNP Chief General Rodolfo Azurin Jr. pinaagi sa Directorate for Personnel Records Management (DPRM) niadtong Enero 9.
Kon aprobahan ni Azurin ang pagpalagpot ni Mayo sa serbisyo, ang iyang mga benepisyo mawala ug siya ma-disqualify hangtod sa hangtod sa pagkupot sa bisan posisyon sa gobyerno.
Si Mayo, kanhi sakop sa Special Operations Unit sa PNP Drug Enforcement Group sa National Capital Region, nasikop atol sa drug bust sa Quiapo, Manila niadtong Oktubre 9, 2022.
Ang operasyon naggumikan sa pagkasikop sa usa ka drug suspect nga giilang si Ney Saligumba Atadero atol sa drug bust sa Tondo, Manila niadtong Sabado sa hapon, Oktubre 8.
Nakuha gikan kang Atadero ang kapin sa 990 ka kilo nga shabu nga gibana-banang mobalor og P6.7 bilyunes.
Si Atadero nibutyag sa kapulisan nga mas daghang ilegal nga drugas ang makit-an sulod sa buhatan sa lending company, ang Wealth and Personal Development Lending Inc., sa Sta. Cruz nga gipanag-iya ni Mayo.
Nakuha sulod sa maong buhatan ang duha ka kilong shabu nga gibana-banang mobalor og P13.6 milyunes.
Ang pagkasikop ni Mayo nisangpot sa pagpahigayon og imbestigasyon sa mga opisyal sa PNP, nga matud pa ni Interior Secretary Benhur Abalos Jr., niresulta sa pagkadiskobre nga pipila ka mga third-level police official ang nalambigit sa illegal drug trade.
Kini maoy nakaaghat ni Abalos, uban sa pag-abag ni Presidente Ferdinand “Bongbong” Marcos Jr., sa pagpanawagan sa mga third-level police official nga mosumiter sa ilang courtesy resignation sa tinguha nga matangtang sa organisasyon ang scalawag nga mga pulis. (TPM sa SunStar Philippines)