Gipaluagan na ang pagbiyahe human dili na kinahanglan mopaubos sa Covid-19 test gawas kon gi-require sa local government unit (LGU) sa destinasyon.
Kini ang gipahibalo sa Inter-Agency Task Force (IATF) for the Management of Emerging Infectious Diseases kagahapon, Pebrero 27.
Ipaubos lang sa kuwarentina kon kini nagpakita og simptomas sa coronavirus disease 2019 (Covid-19).
Ang maong bag-ong lagda nasulod sa Resolution No. 101 nga napasar sa IATF niadtong Biyernes, Pebrero 26, 2021 aron pag-standardize sa travel protocols alang sa land, air ug sea.
Ang IATF nitangtang na usab sa documentary requirements alang sa mobiyahe.
Wala na kinahanglana ang travel authority gikan sa Joint Task Force Covid Shield.
Ang health certificates giwala na usab.
Ang authorized persons outside residence (Apor) gikan sa mga ahensiya sa nasodnong kagamhanan ug ilang attached agencies, dili na mopresentar og identification card, travel order ug travel itinerary.
Apan mopasar sa screening sa simptomas sa puwerto sa pag-abot ug pagbiya sa puwerto.
Ang LGU mo-require sa Covid-19 test, kini limitado sa reverse transcription polymerase chain reaction (RT-PCR), sumala sa resolusyon sa IATF.