KALIWAT sa sa giingong drug lord gipusil patay wa mailhing tawo niadtong Lunes sa gabii sa Duterte st., Barangay Suba, dakbayan sa Danao.
Si Reynaldo Francis Torralba Alvaro, 39, minyo, patay human natusaktusak sa mga bala dihang gipusil sa lima ka wa mailhing mga lalake.
Naangol ang iyang anak babaye human naigo sa saag nga bala.
Sa imbestigasyon sa kapulisan, si Reynaldo Francisco nagbarogbarog atubangan sa ilang balay dihang naabot ang lima ka mga lalake.
Ang mga lumolupyo sa dapit wa makaila sa mga tawo sanglit pulos nagsul-ob og bonnet.
Wa masuta sa kapulisan unsay motibo sa krimen apan ilang nasuta nga ang biktima kaliwat ni Alvaro “Barok” Alvaro, giilang drug lord sa Sugbo.
Gibutyag ni Supt. Jaime Quiocho Jr., hepe sa Danao Police Station nga nahinabi sa Superbalita Cebu,
nga si Reynaldo tuong kamot ni Barok, sinaligan sa transaction sa ginadiling drugas ug nagsilbig hitman.
Sa wa pa mapriso si Barok, si Reynaldo maoy gitahasan sa pagtumba niadtong di mobayad nila sa giangkat nga illegal nga drugas.
Si Quecho nidugang nga si Reynaldo high value target kay siya level 2 drug pusher ug aktibo gihapon sa illegal nga kalihukan.
Gituohan nila nga posibling isyu sa drugas ang motibo sa samtang wa sab nila isalikway ang posibilidad nga gibawsan sa iyang mga kontra.