WALA'Y mga election-related nga alarma ang natala sa kapulisan sa Dakbayan sa Mandaue sukad sa pagsugod alas 6, Lunes sa buntag hangtud na ala 1 sa hapon.
Kini gihulagway ni Mandaue City Police Office Director Police Colonel Julian Entoma nga nagmalinawon pa.
Apan aduna'y nahitabo nga pagpanibas nga natala sa Barangay Jagobiao, Dakbayan sa Mandaue, alas 12:35 sa udto.
Ang biktima ug suspetsado, magsuon lang.
Ang biktima giila nga si Fermin Olivar, 68 anyos, minyo, gitigbas kini sa iyang manghud nga si Maximiano Olivar, 63 anyos.
Sa inisyal nga pakisusi nga gihimo sa Basak Police Station nga giingong naglalis ang duha nga niresulta sa pagpanigbas.
Ang biktima dali nga nadala sa Eversley Child Hospital samtang ang suspetsado ang napriso na sa Basak Police station.
Matud ni Entoma nga padayon pa nga gisusi kon may kalambigitan ba sa eleksyon ang giawayan sa duha. (FMD)