IGSUON sa usa ka non-uniformed personnel (NUP) ang nasikop sa Talisay police sa gihimo nga buy-bust operation sa Dalan Abores, Barangay Bulacao, Dakbayan sa Talisay Huwebes sa gabii, Oktubre 24, 2019.
Ang nasikop giila nga si Bernardo Delfin, 57, molupyo sa maong lugar, ug giila sa Talisay Police nga usa ka High Value Target.
Nakuha gikan kaniya ang usa ka dakong putos ug 26 ka gagmay nga pinakite sa gituohang shabu.
Gibana-bana nga motimbang sa 4.78 gramos ang ebidensya nga nakuha gikan ni Delfin nga mobalor og P33,000.
Sa gihimo nga dugang pakisusi sa Talisay police nasuta nga igsuon si Delfin sa usa ka NUP nga nadestino sa Cebu Provincial Police Office.
Nagpuyo lang usab ang magsuong Delfin sa usa ka panimalay hinungdan nga lakip na sa gipaubos sa imbestigasyon ang igsuon sa dinakpan aron masuta kon aduna ba kini kalabutan sa ilegal nga negosyo sa iyang igsuon.
Samtang laing durugista pa diha sa Barangay Bulacao ang nasikop pasado alas 9 Huwebes sa gabii.
Ang nasikop giila nga si Gabriel Reyes Ong, 27, giilang street level pusher.
Nasakmitan si Ong og 13 ka gagmay nga pinakete sa gidudahan nga shabu. (FMD)