GIHULAGWAY ni Pmaj. John Kareen Escober, hepe sa Pardo Police Station nga sulbad na ang kaso sa pagpatay niadtong 18 anyos nga Grade 11 student, human nga mitahaan ngadto ni Cebu City Vice Mayor Michael Rama ang ikaduhang suspek niadtong Huwebes, Marso 12.
Giila nga si Romnick Badinas Ebarra, legal age ug silingan ni Patricio Lapinid, 24 unang dinakpan nga gikatahong responsable sa pagdunggab-patay ni James Danyel Espinosa, taga-Sityo San Roque, Barangay Mambaling, dakbayan sa Sugbo nga nahitabo niadtong Marso 10.
Nasuta nga ang nangulo sa pagpanulis mao si Ebarra kinsa maoy gi-ila nga lider sa ilang grupo nga mga notado nga mga tulisan.
Kasong robbery with homicide ang gisang-at batok sa duha ka mga dinakpan. (BBT)