Nasikop sa kapulisan ang giingon nga usa sa mga “hitman” ni kanhi Kong. Arnolfo “Arni” Teves Jr. sa Negros Oriental.
Si Rolando Pinili, alias ”Inday”, 32, mag-uuma, nasikop sa alas 11:02 sa gabii sa Huwebes, Oktubre 12, 2023 sa Purok 3, Sitio Balangbang, Brgy. Nilantayan, lungsod sa Basay, Negros Oriental.
Si Pinili, usa sa gitumbok sa pagpatay kang anhing Board Member Miguel Dungog, Lester Bato ug Pacito Libron niadtong 2019.
Si Police Major Nazarino Emia, officer-in-charge (OIC) sa CIDG Negros Oriental Provincial Field Unit (PFU), maoy nangulo sa pagsikop kang “Inday” uban sa mga sakop sa Basay Police Station sa Negros Oriental Police Provincial Office (NOPPO).
Matod ni Emia nga nahinabi sa Supebalita Cebu, si Inday nitago sa bukid sa maong lugar human ang iyang ngalan nigawas sa gipahigayong Senate inquiry.
Gisikop nila si Inday pinasikad sa warrant of arrest nga gi-isyu ni Judge Amelia Lourdes Uy Mendoza sa Branch 34 sa Regional Trial Court (RTC 7) sa Dumaguete City, Negros Oriental nga gipetsahan og Oktubre 4, 2023 nga walay piyansa nga gitugot.
Ang kaso nga murder nga gipasaka niadtong Mayo karong tuiga giisip nga heinous crime busa way piyansa nga gitugot ang korte.