Gitinuod ni Mayor Junard “Ahong” Chan ang iyang saad nga iyang hatagan og reward ang si bisan kinsa nga makasumbong kaniya niadtong tawo o mga tawo nga nag-vandal sa mga dapit sa siyudad, labina niadtong mga dapit nga gipapintalan ug iyang gipadibuhoan sa nagkadaiyang mga organisasyon.
Niadtong Martes, Abril 25, 2023, gihatag sa mayor ang P15,000 ngadto sa usa sa duha ka mga informer sud sa iyang buhatan.
Ang mayor nitanyag og P30,000 nga ganti ngadto sa mga informer nga makasumbong kaniya nga mosangko sa pagkasikop sa vandal.
“Kay duha man kabuok ang nagdungan og hatag sa detalye sa bag-o lang nadakpan nga nagpaluyo sa vandal sa Brgy Pusok, atong gitunga ang P30,000 sa duha ka tawo. Ato nang gihatag ang katunga nga P15,000 sa unang misumbong ug nagpaabot na lang kita sa ikaduha nga mobisita sa atong opisina,” matod ni Chan sa iyang social media post.
Wa niya gibutyag ang ngan sa tawo ug gitaptapan usab ang nawong niini.
Gipaneguro sa mayor nga di mailhan ang mga impormante busa di angay nga mahadlok ang si bisan kinsa nga mosumbong.
“Abli pa gyud kaayo ang akong opisina nga modawat og mga sumbong nga sama niini aron wala na gyud kitay makita nga mga vandal sa atong palibot. Daghan pa ko giandam nga P30,000 sa mga naghilomhilom lang diha,” dugang ni Chan.
Niadtong Abril 20, 2023, duha ka mga menor de edad ang gipangdakop sa mga awtoridad human sila nasakpan sa akto nga nihimo og bandalismo sa dakbayan.
Sila gi-turn over sa City Social Welfare and Development Office (CSWDO) alang sa pagpahinumdom sa maong kalapasan.
Ang mga indibidwal nga makahimo og vandalism ug uban pang mga buhat sa malicious mischief nga makaguba sa “clean and green” nga proyekto sa Siyudad kinahanglan nga mobayad og hangtod sa P5,000 isip mga silot ug mahimong mapriso.
Ubos sa Ordinansa 16-055-2022 nga gipangamahanan ni Konsehal Linda Susan Baring ug giaprobahan sa Sangguniang Panlungsod niadtong Nobiyembre 2022, ang mga makalapas momulta og P3,000 sa unang paglapas; P4,000 sa ikaduhang paglapas; ug P5,000 sa ikatulo nga paglapas ug pagkabilanggo depende sa hukom sa korte. (REV)