Gihingusgan karon sa Police Regional Office (PRO) 7 ang internal cleansing sa hut-ong sa kapulisan sa Central Visayas nunot sa insidente sa recycling sa illegal drugs nga giingong gihimo sa mga sakop sa usa ka unit sa Philippine Drug Enforcement Agency (PDEA) sa kaulohan sa Disyembre 6, 2022.
Ang mao nga mga personnel nasikop sa usa ka buy-bust.
Si Police Brigadier General Roderick Augustus Alba nimando sa iyang personnel sa paglusad og regular internal audit ug inspection aron malikayan ang pag-recycle sa ilegal nga drugas sa mga pulis.
Lakip sa ipasusi ni Alba ang mga ebidensiya nga naa sa kustodiya sa Philippine National Police (PNP) sama sa Regional Forensic Unit 7 kon wala ba kini makuhai.
Bahad ni Alba nga iyang silotan ang mga personnel nga mo-recycle sa ilegal nga drugas ilabi na karon nga sila ang nag-una sa dunay labing daghang nadakpan nga drug personalities sa tibuok Pilipinas.
Dili usab siya magpanuko sa pagparelibo sa katungdanan sa tanang personnel sa unit dungan sa pagpasaka og kasong kriminal ug administratiba kon masakpan.
“Drastic actions are to be undertaken if anyone is found involved in these illegal activities. Citing the failure in command responsibility, immediate relief of the entire unit without prejudice and filing appropriate charges against the culprit and the superiors or relief of two units with the same cause and will recommend to CPNP for immediate relief of the PD/CD/FC RMFB and staff if found implicated in the illegal activities,” pasidaan ni Alba.
Niadtong Disyembre 9-11, 2022, ang tanang taas nga mga opisyal sa PRO-7 nihimo og command visit sa kampo sa kapulisan sa Negros Oriental ug Siquijor alang sa pagpalapad pa sa katukoran sa One Cebu-Inter-Agency Interdiction Task Force OC-IAITF nunot sa tinguha nga matubag ang problema sa ilegal nga drugas sa rehiyon.
Nipasalamat si Alba sa tanang gobernador sa Central Visayas nga nihatag sa ilang suporta sa pag-umol sa OC-IAITF nga unang gisugdan ni Gobernador Gwendolyn Garcia, kinsa nideklarar og all out war batok sa ilegal nga drugas.