Ang labing unang international cat show sa Mandaue City nga gipasiugdahan sa World Cat Federation Philippines (WCF) ug sa Society of Feline Enthusiasts of the Philippines (SFEPI) nakadani og gatusan ka mga mahiligon sa iring gikan sa nagkalainlaing nasod.
Ang kalihukan nga gipahigayon sa Mandaue City Sports and Cultural Complex gikan sa Biyernes, Agusto 25, hangtod Sabado, Agusto 26, dungan sa pagsaulog sa ika-54 nga Charter Day sa Dakbayan karong Agusto 30.
Gipasiugdahan kini ni Mandaue City First Lady Sara Walker-Cortes.
Kini ang labing unang international cat show sa Central Visayas ug ikatulo sa Pilipinas, matod ni Leo Maclang, presidente sa WCF sa SFEPI, niadtong Biyernes, Agusto 25.
Ang duha ka miaging show gipahigayon sa Manila niadtong 2019 ug Hunyo karong tuiga.
Ang nag-unang tumong sa maong kalihukan, sumala ni Maclang, mao ang pagdasig sa responsableng pagpanag-iya sa mga binuhi, pagpreserbar sa kaliwat sa purebred nga mga iring, ug paghatag og kahigayunan sa mga non-government organizations (NGOs) nga makigtambayayong sa mga local government unit (LGUs) sa paghimo sa mga rescue, mga pagsagop, ug mga bakuna batok sa rabies.
Ang mga partisipante nagtigi alang sa duha ka nag-unang kategoriya, table ug ring judgement, ug uban pa, ug nagpa-enrol online niadtong Hunyo, nga nagbayad og P500 sa mga tumatan-aw, P10,000 sa purebred, P5,000 sa beginner, ug P1,000 sa puspin o Pusang Pinoy.
Ang mga mananaog gihatagan og mga sertipiko ug makigtigi sa Manila International Cat Show sa katapusang quarter sa 2023.
Usa sa mga mananaog, si Joshua Donasco, 33, taga General Santos City, kinsa adunay ragdoll nga gihinganlan og “Duke,” niingon nga usa ka dungog alang kaniya ang pagsalmot sa usa ka cat show sa unang higayon.
Dugang pa niya nga dako ang iyang gibati sa pagtabang sa mga iro ug mga kuting nga naluwas pinaagi sa mga kalihukan.
Ang Top One sa Kitten Ring Category naangkon ni Duke.
Matod ni Maclang nga ang kita sa maong kalihukan mahiadto sa Island Rescue Organization (IRO) sa Mandaue City, usa ka non-profit organization nga nagsilbing puy-anan sa na-rescue nga mga iring ug iro aron makatabang sa ilang medikal nga panginahanglanon ug suplay sa pagkaon.
Ang presidente sa IRO nga si Annalyn Aizpuru nipadayag sa pasalamat sa pagkapili nga maoy hatagan, ug gipasiugda kon unsa ka mahinungdanon kini sa pagluwas sa daghang walay puy-anan nga mga iring ug iro ug paghatag kanila og bag-ong mga balay, pamilya, ug paglaum. / HIC