Nagkadaiyang mga isyo giisa sa cause-oriented groups sa usa ka press conference aron ipadangat ang ilang mensahe ngadto kang Presidente Ferdinand Marcos Jr. subay sa iyang State of the Nation Address (SONA) niadtong Hulyo 24, 2023.
Ang Cebu United People’s nipahigyon og press conference sa Pagtambayayong Conference Hall, Urgello St., Cebu City sa Hulyo 21, 2023, tulo ka adlaw sa wala pa ang 2nd SONA sa Presidente. Nitambong sa press conference ang mga representante gikan sa Akbayan, All UP Academic Employees Union (AUPAEU), Bagong Alkansang Makabayan (BAYAN), Partido Manggagawa, Sentro ng Nagkakaisa at Progresibong Manggagawa (SENTRO) ug Urban Poor All-Cebu (UP All-Cebu).
Nitambong usab ang mga representante gikan sa Independent Vendors for Empowerment and Development (IVEND), Bukluran ng Manggagawang Pilipino (BMP), University of San Carlos Student Council (USC-SSC), Partido Manggagawa Cebu (PM-Cebu), AMA Sugbo-KMU, Kilusan ug FDC.
“Ayaw namo og high-rise condominiums tungod sa mosunod nga rason: dili namo kaya ang monthly amortization sa PAG-IBIG, loan amounting to P1.2 million per unit with an average of more or less P12,000 monthly. Dili namo kaya yan,” matod ni Ruth Ylanan sa UP All-Cebu.
Si Noe Santillan sa AUPAEU nipadayag usab sa iyang kasagmuyo sa desisyon ni Bise Presidente ug DepEd Secretary Sara Duterte nga patrabahuon ang mga eksperto aron tun-an ang hangyo sa mga magtutudlo nga usbawan ang ilang suholan ug dugang benepisyo.
“Tutukan daw nila pero mag-hire pa daw sila ug experts aron tun-an nga suggestion. Unsa man diay ang atong 57,000 ka pirma sa educators? Dili ba to konkretong kahimtang?,” matod niya.
Si Dennis Derige sa Partido Manggagawa Cebu (PM-Cebu) nanghinaut nga sa 2nd SONA ni Presidente Marcos, matubag ug masulbad ang mga isyo sa panginabuhian ug kontraktwalisasyon sa mga mamumuo.
Si Joel Villanueva Jr. sa USC-SSC naghisgot usab sa mga isyo nga giatubang sa mga batan-on sa Sugbo isip mga estudyante.
“Sa ngalan sa tanang estudyante sa Cebu, padayon kami nga manawagan nga dili ang tuition fee increase sa mga pribadong unibersidad, dili ang budget cuts sa mga pampublikong unibersidad, dili ang mandatory ROTC ug ang pagdepensa sa acadamic freedom,” matod niya.
Si Cristina Oganiza sa Akbayan Party naningil usab sa mga saad ni Presidente Marcos alang sa nasod.
“Unsang progress? Ang nagpadayong recession sa atong nasod? What system works? Ang low governance? Ang pag appoint ni Larry Gadon isip anti-poverty czar nga gi-disbar sa Korte Suprema sa pagka-abogado?,” siya niingon.
Si Jake Barrientos sa Kilusan namulong bahin sa seguridad alang sa Pilipinas ilabina sa mga tensyon tali sa Estados Unidos ug China.
“Hisgutan jud ni kay naa na’y umaabot ug aktuwal nga mga gyera sa laing nasud. Naa ta diri sikit sa China, naa sad diri ang mga military bases sa America. Kita ang unang maigo. Dapat igiit nato atong soberanya as Philippines nga dili ta nagasandig sa U.S or dili ta mangita’g away sa atong silingan nga China,” matod niya.
Ang Nagkahiusang Katawhan sa Sugbo mopahigayon og rally sa Metro Colon karong Lunes sa buntag, Hulyo 24, 2023. (Miguel Angelu Lumen, CNU Intern)