Nagtingkagol sa selda sa Mabolo Police Station ang usa ka janitor sa dakong mall sa Barangay Apas, siyudad sa Sugbo, human nasakpan sa gwardiya nga nipalusot og bukog sa karne sa iyang paggawas sa iyang trabaho.
Ang nadakpan mao si Junver Dejito Vercede, 29, taga Sitio Baca, Barangay Apas, siyudad sa Sugbo.
Si Vercede gipusasan sa nagbantay nga gwardiya nga si Maria Regina Batosalem Pantilgan, 43, sakop sa CQB Security Agency nga nadestino sa mall.
Sa alas 6:30 sa gabii sa Miyerkules, Hunyo 28, 2023, nadiskobrehan ang pagpalusot unta og bukog sa karne nga pangsabaw gikan sa freezer atol sa iyang pag-uli dihang gihiling ang dala niining gamit.
Samtang, alas 11:30 sa gabii susamang adlaw una pa siya gidala sa Mabolo Police Station aron i-turnover ngadto sa kapulisan human gipaubos sa medical examination ang janitor.
Ang suspek, atol sa pagtanggong sa gwardiya niya ug gihiling ang iyang dala, dunay usa ka putos nga dunay sulod nga bukog sa baboy nga wala mapanso busa siya gipangutana kon nganong may dala kining bukog.
Tubag ni Vercede nga ang iyang kauban maoy nipadala kaniya sa maong putos apan wala siyay kasayuran nga naay giapil nga bukog.
Si Vercede nibutyag nga ang iyang kauban nga nagpadala kaniya ang ilang kahera ug tindera.
“Gipadala to sa akoa, Sir, sa cashier namo ug tindera. Ingon man siya nga okay nana, dalha nana didto og apil,” matod ni Vercede.
Matod niya nga igo rang namalihog sa iyaha ang iyang kauban hinungdan nga nisugot usab siya. Wala siya magtuo nga maingon adto ang hitabo.
Samtang, susihon pa ang recording sa closed circuit television (CCTV) camera aron pagsuta sa alegasyon sa janitor.
Iyang panawagan sa kahera ug tindera nga mosulti sila sa tinuod kay sa iyang pagkahibalo, ni-deny na kini.
Ang bukog nga nagkantidad og P116.38 nabawi ra sa gwardiya gikan kang Vercede.
Kasong pagpangawat ang atubangon nga kaso sa suspek.