Janitor napriso kay giingong nangawat og chlorine nga balor og P61 alas 4:10 sa hapon sa Huwebes, Agusto 11, 2022 sa usa ka kompaniya nga nagbase sa Brgy. Canamucan, lungsod sa Compostela, amihanang Sugbo.
Ngan sa kompaniya gipugngan ning mantalaan samtang wa pa nakuhaan sa habig.
Ang head guard sa buhatan nga si Rolly Caburnay, 42, maoy nagrepresentar sa pagsang-at og kasong qualified theft.
Si Florito Puyos Pelit, 28, ulitawo, minyo, taga Sitio Camanggahan, Brgy. Don Gregorio Antigua, lungsod sa Borbon, gi-inquest na sa iyang kaso sa Biyernes sa buntag.
Si Police Lt. Andrew Rellanos, hepe sa Compostela Police Station nga nahinabi sa Superbalita Cebu, nagkanayon nga off na si Pelit ug padulong mogawas.
Sa pag-inspection sa security guard nga si Jubert Cayangnong Luchavez, 39, nakita sa bag ni Pelit ang usa ka puwa nga plastic nga dunay sulod nga chlorine nga mobalor og P61 nga gisulod sa lunch box.
Gipusasan gilayon ang janitor sa security guard nga nanawag og mga pulis.
Sumala ni Rellanos nga ang dinakpan nibutyag nga gamiton niya ang chlorine sa ilang pasong nga punduhanan og tubig sa uwan.
Una niyang higayon nga nagdala og gamay nga chlorine gikan sa ilang trabahoan. Apan nangayo siya og pasaylo sa iyang nahimo nga kasaypanan.
“Naluoy pud mi niya kay dunay mga anak, gamiton lang daw ang chlorine sa gipundong tubig sa uwan. Nitabang mi sa paghangyo nga bayaran ang P61 nga chlorine pero wala mosugot ang management,” dugang ni Rellanos
Si Pelit nihilak nga nihangyo sa management apan gibalibaran sa kompaniya.
Gumikan niini, napasakaan og kasong qualified theft si Pelit human na-inquest.
Si Rellanos nagkanayon nga kaniadto sab dunay kawani sa maong kompaniya nga nasakpan nga nagdala og hotdog balor og P30 sa iyang paggawas gikan sa trabaho.
Nanghangyo ang kawani nga nadakpan nga iyang bayran apan wala gihapon pasayloa sa management, gikasuhan gihapon.