Dili pugson ang mga ginikanan nga dili makapalit og uniporme sa eskwelahan sa ilang mga anak nga na-enroll sa mga publikong tunghaan sa Central Visayas sa school year 2023-2024.
Si Regional Director Salustiano Jimenez sa Department of Education (DepEd 7) niklaro sag Huwebes, Agusto 24, 2023 nga dili kinahanglan nga mag-uniporme sa mga pampublikong tunghaan.
Matod niya nga kini aron malikayan ang dugang gasto sa mga pamilya sa mga tinun-an, kay dunay mga ginikanan nga way ikapalit.
“Naa man sad gyud mga ginikanan moingon nga dili lang kay wala gyud mi ikapalit og uniform. So, kon imoha nang-irequire ang uniform louy pud kaayo,” matod niya.
Dugang pa sa direktor nga ang mga ginikanan, ilabina kadtong mga kabos sa panalapi, ang pagtugot sa ilang mga anak nga magsul-ob og uniporme kinahanglan magdepende sa ilang katakus sa pagpalit.
Apan usa ka inahan sa duha ka anak nga taga dakbayan sa Talisay nitug-an sa SunStar Cebu s Huwebes nga bisan wala kini gikinahanglan sa gobyerno, ang iyang umaabot nga Grade 3 nga anak nga lalaki ug ang umaabot nga Grade 7 nga anak nga babaye pasul-ubon gihapon niya og uniporme sa eskwelahan.
“Mas ganahan ko makakita og bata nga nagsul-ob og uniporme sa eskwelahan. Aside nga desenteng tan-awon ug tarong, at the same time mailhan ang bata nga enrolled siya sa maong eskwelahan,” matod ni Marilyn Carten, 35.
Sa wala pa ang pagbukas sa miaging school year, si Bise Presidente ug DepEd Secretary Sara Duterte niingon niadtong Hulyo 2022 nga dili na kinahanglan nga mag-uniporme ang mga estudyante.
Gitumbok ni Duterte ang mga rason sama sa dugang gasto sa mga pamilya taliwala sa padayong pagsaka sa presyo sa mga batakang palaliton sa nasod.
Base sa DepEd Order No. 065 nga gipagawas niadtong 2010 o ang General Guidelines on the Opening of Classes, Including Collection of School Contributions, Enrolment, Student Uniforms ug Release of MOOE, dili obligado ang pagsul-ob og uniporme sa eskwelahan bisan sa panahon sa pre-pandemic.
KOLEKSIYON
Gawas sa non-compulsory nga pagsul-ob og uniporme, giklaro usab sa direktor nga kinahanglan nga walay mga kontribusyon, sa bisan unsang porma, nga ipamugos ngadto sa mga tinun-an sa publikong tunghaan.
Iya usab nga gideklarar nga way mga donasyon nga kinahanglang pangayuon sa mga tinun-an ilabi na kon kini makawala sa pinansyal nga konsiderasyon ug makadugang sa palas-anon sa mga ginikanan.
Ubos usab sa samang DepEd Order, gipiho ni Jimenez nga pipila lang ka kontribusyon ang mahimong makolekta, apan boluntaryo lang. / KJF
Kini naglakip sa Boy Scouts of the Philippines sa tag P50 matag estudyante; Girl Scouts of the Philippines sa tag P50 matag estudyante; Anti-TB Fund Drive alang sa P5 matag estudyante; Parents-Teachers Association nga kinahanglan nga ideterminar sa board of firectors; school publication sa kantidad nga P60 sa elementarya ug P90 sa sekondarya; ug Pagkamiyembro sa mga organisasyon sa mga estudyante nga kinahanglan ibase sa mga kasamtangang polisiya sa eskwelahan.
ABLI SA KLASE
iadtong Agusto 3, gipahibalo sa DepEd Central Office sa Manila nga sa Agusto 29 ang pag-abli sa klase sa tanang pampublikong tunghaan alang sa umaabot nga school year.
Hinuon, ang mga pribadong tunghaan dili kinahanglang mosunod sa direktiba sa DepEd./ KJF