Nasikop sa mga operatiba sa Operation Detection Section sa Criminal Investigation and Detection Group (CIDG) 7 ang mga namaligya o mga parte sa paghimo og eksplosibo o pabuto, atol sa buy-bust alas 12:30 sa udto sa Dominggo, Oktubre 9, sa parking lot area sa usa ka mall sa South Road Properties sa Barangay Mambaling, siyudad sa Sugbo.
Ang operasyon gipangulohan ni Police Colonel Peter Tagtag Jr., bag-ong pangulo sa CIDG 7, nga niresulta sa pagkasikop sa duha ka dinakpan, sila si Elmer Gravador Santos, 60, ug Ernesto Sorilla Garcia Jr., 48, mga molupyo sa Barangay Biasong, dakbayan sa Talisay.
Nasakmit ang usa ka kahon nga dunay sulod nga mga binandol nga moabot sa 50 kabuok nga detonating chord nga dunay blasting cap ug laing kahon nga may sud nga 50 ka mga detonating chord uban sa blasting cap.
Ang mga dinakpan pasakaan og kaso nga kalapasan sa Republic Act 9616 o ang balaod sa illegal nga paghupot sa mga gamiton sa paghimo og eksplosibo ug kahimanan sa pagpabuto.