Ang Mandaue Mangrove Nursery namugna aron mahimong tinubdan sa sunod tuig nga gitarget nga 30,000 ka bakhaw sa Mandaue Green Learning Park o ang kanhi dumpsite sa Barangay Umapad, Mandaue city aron makab-ot ang eco-tourism area.
Ang Mangrove Nursery gimugna sa 298 ka benepisyaryo nga gikan sa 160 ka mga mananagat ug 138 ka mga batan-on diin aduna silay 10 ka adlaw nga pagbansay-bansay nga adunay tumong sa pagpalambo sa huyang nga komunidad pinaagi sa mangrove protection.
Si Sharon Mangadlao, officer-in-charge sa City Agriculture Office (CAO)- Mandaue, niingon niadtong Martes, Hunyo 27, 2023, nga walay kalasangan ang Mandaue city tungod kay highly urbanized nga siyudad.
Ang mga bakhawan mao lamang ang ilang natural nga kahinguhaan nga makakuha og atraksyon tungod kay ilang gitarget nga adunay eco-tourism sa mangrove forest.
“Wala naman gud tay gitawag nga forest area noh kay tungod kay daghan nga buildings pero atong number one natural resource nga nindot kaayo nga mahimu eco tourism is ang atong mangrove forest area nato nga atong giprotektahan ug sige nato’g giamuma, sige tag gatanom para mas molambo ang atong 72 hectares sa atong mangrove. Mao nay ato gitan-aw nga mao na atong gikuanan og programa,” matod ni Mangadlao.
Ang mga benepisyaryo nakahimo sa pagprodyus alang sa ilang nursery og mga 4,700 ka bakhaw nga seedlings.
“Nag bagging sila ug kanang wildlings sa mga bakhaw ilaha sa i-seedling. They were able to produce or naka bag sila og 4, 700 mangrove seedlings”, matod ni Mangadlao.
Si Rene Cobong, presidente sa Federation of Fisherfolks and Bantay Dagat, niingon niadtong Martes, Hunyo 27, nga sa Mandaue adunay walo ka mangrove forest areas diin nahimutang sa coastal areas sa mga Barangay Umapad, Labogon, Paknaan, Basak, Opao, Subangdaku, Looc, Jagobiao.
Matod ni Cobong nga ang ilang mangrove nursery adunay lainlaing klase sa bakhaw sama sa miyapi, bakhaw baye, bakhaw laki, ug pagatpat ug uban pa. Dunay endangered species sa mangrove nga mao ang avencia nga nahimutang sa Barangay Basak ug Jagobiao.
Si Sharon, batan-on sa Barangay Umapad, usa sa mga benepisyaryo ug tig-atiman sa ilang mangrove nursery, nagkanayon nga sa bata pa sila makatabang sila sa pagpananom og bakhaw aron maprotektahan ang ilang mga lugar gikan sa mga kalamidad sanglit duol ra ang ilang gipuy-an sa baybayon. (SuperBalita Cebu)