Kalsada sa San Fernando, Sibonga mapasemento na

Ang Cebu Provincial Board nihatag og gahom kang Cebu Governor Gwendolyn Garcia pagpirma sa kontrata balor og P249 milyunes nga infrastructure project alang sa duha ka local government units (LGU) sa lalawigan sa Sugbo.

Si Bokal Andrei Duterte sa ikalimang distrito sa lalawigan sa Sugbo nipasar og resolution atol sa regular session sa Sangguniang Panlalawigan aron mapirmahan ni Garcia ang tulo ka road concreting projects nga nadaog sa Shalom Construction Inc.

Ang unang proyekto mao ang road concreting sa Isidro-Ilaya-Cabatbatan Road Section, sa lungsod sa San Fernando nga balor og P64.4 milyunes.

Ikaduha mao ang pagsemento sa Sangat-Lantawan Road Section sa samang lungsod nga nagkantidad og P64.4 milyunes nga humanon sulod sa 256 ka adlaw.

Ang duha ka mga proyekto nga balor og P128.8 milyunes alang sa San Fernando maoy magpanindot sa ilang karsada nga nanukad sa national highway paingon sa kabukiran.

Gumikan sa maong proyekto, mapasayon na unya alang sa mga taga San Fernando ang pagbiyahe sa nahisgutang mga dalan ug paspas na unya ang pagtunol sa mga batakang serbisyo alang sa mga residente.

Ikatulo nga nadaog sa samang contractor mao ang P122.1 milyunes nga Lamakan-Mangyan-Candaguit Road Section, Sibonga, Cebu, nga gikatakdang humanon sulod sa 324 ka mga adlaw.

Sa Martes, Abril 25, si Garcia maoy nangulo sa ceremonial groundbreaking sa road concreting project sa Brgy. Caputatan Norte-Brgy Dalingding Sur sa lungsod Medellin, amihanang Sugbo.

Niadtong unang semana sa Abril, ang SP, pinaagi ni Duterte, nipasar usab og resolution sa paghatag og gahom ni Garcia aron makapirma sa mga kontrata tali sa nagkalainlain nga contractors nga nagbalor og P457 milyunes.