Ang kampo ni suspended Negros Oriental First District Representative Arnolfo Teves Jr. niduso og mosyon sa Huwebes, Hunyo 22, 2023, nga naghangyo sa Department of Justice (DOJ) sa pagpa inhibit sa mga prosecutor sa preliminary proceedings kalabot sa pagpatay kang Negros Oriental Governor Roel Degamo.
Sa 14 ka pahina nga motion, ang legal counsels ni Teves niingon nga tungod sa mga pamahayag nga giluwatan ni Justice Secretary Jesus Crispin Remulla, nga nag-tag sa magbabalaod isip mastermind sa pagpatay, wala nay kasegurohan sa impartiality sa imbestigasyon.
“Unfortunately, in this case, no prosecutor under the Department of Justice can confidently and honestly say that they can resolve this preliminary investigation with fairness, impartiality, independence and integrity as demanded by law and jurisprudence,” mabasa sa motion.
“This is primarily because their boss, the Secretary of Justice... has been firm in claiming that Teves Jr. is the mastermind in the death of Gov. Degamo, even prior to the filing of this case,” kini nidugang.
Namatikdan usab nila ang “gipakita nga simpatiya ug pagmahal” ni Remulla sa mga kabanay sa gobernador, labi na sa iyang biyuda nga si Pamplona Mayor Janice.
Ang pasiuna nga imbestigasyon kinahanglang dumalahon hinuon sa Opisina sa Ombudsman aron makaseguro si Teves nga way gidapigan ang tribunal nga mosusi kon duna bay probable cause ug aron masiguro nga ang iyang konstitusyonal nga katungod sa hustong proseso nasunod.
Si Attorney Ferdinand Topacio, usa sa mga abogado ni Teves, niingon nga hayan makabalik na sa nasod ang iyang kliyente ug atubangon ang mga pasangil batok kaniya.
Si Degamo gipusil niadtong Marso nga niresulta usab sa kamatayon sa siyam ka inosenteng sibilyan.
Gipasaka na ang mga rekamong pagpatay batok kang Teves ingon man sa 11 ka mga suspek nga giingong niapil sa pagpatay.
Ang mga suspek sa sinugdanan niangkon sa ilang kalambigitan sa krimen, nga nagtumbok kang Teves isip utok, apan sa ulahi gibakwi ang ilang mga pag-angkon, nga nag-ingon nga sila napugos sa paghimo sa maong affidavit.
Kasamtangang naa sa gawas sa nasod si Teves ug nagdumili na sa pagbalik tungod sa giingong mga hulga sa iyang kinabuhi ug sa kinabuhi sa mga sakop sa iyang pamilya. (TPM sa SunStar Philippines)