Usa ka drug surrenderer gipatay ug napalgang gilabay sa awaaw nga lugar, alas 6:10 sa buntag sa Miyerkules, Hulyo 5, 2023 sa Barangay Jomgao, lungsod sa Argao.
Si Jairo Camarillo, 22, ulitawo, taga Brgy. Lamacan, lungsod sa Argao, nakaangkon og daghang mga samad pinusilan sa ulo.
Ang biktima napalgan sa usa ka Jemuel Duran, kinsa nitugway sa iyang binuhing baka.
Si Police Major Ivy Bartolome, hepe sa Argao Police Station nga nahinabi sa Superbalita Cebu, nagkanayon nga daghang mga anggulo ang ilang gisubay nga motibo sa krimen.
Hinuon, nag-una ang motibo sa drugas gumikan kay usa ka kanhi drug surrenderer ang biktima.
Sutaon nila kon wala ba kini mobalik sa karaang bisyo o kaha namaligya.
Gipadayag niini nga ang kabanay nagduda sab nga mibalik sa bisyo ang biktima.
“Gi-salvage gyud ni siya, gidala sa mga responsabli diri kay awaaw kaayo,” dugang ni Bartolome.
Narekuber nila sa crime scene ang lima ka mga kabhang sa bala sa 9mm. ug kalibre .45 nga pistola.
Ang biktima gikatahong nananghid sa iyang ginikanan sa miaging gabii kay mosuroy uban sa mga barkada.
Wala na makauli ang biktima sa ilang balay, napalgan nalang patay sa pikas barangay.
Mga lumolupyo sa duol nakadungog og buto sa pusil nianang mga pasado sa alas 9 sa gabii sa Martes. (GPL)