USA ka kilo sa gituohang shabu nasakmit sa kapulisan sa buy-bust operation Lunes sa gabii, Disyembre 28, 2020 gikan sa tulo ka gikatahapang mga durugista, duha kanila managkauban kanhi sa Cebu Provincial Detention and Rehabilitation Center (CPDRC)) diin sila nagkasuod.
Ang nasikop sa joint operation sa Regional Drug Enforcement Unit (RDEU) 7, Philippine Drug Enforcement (PDEA) 7, Police Drug Enforcement Group 7 ug Carcar City police sa Barangay Perrelos, Carcar City mao sila si John Paul Quijano, 35, taga Barangay Tuyom; Paul Lester Salazar, taga Carcar; ug si Teodonar Ian Ausa, 31, igsuon ni Quijano, taga Barangay Mambaling, Dakbayan sa Sugbo.
Si Police Captain Philip John Libres sa RDEU 7 niingon nga si Quijano tulo ka semana nilang gipanid-an.
Human makompirmar ang illegal drug operation niini, ilang gilusad ang buy-bust nga niresulta sa pagkasakmit sa 1.010 kilo sa shabu nga dunay Dangerous Drugs Board (DDB) value nga P6.8 milyunes.
Matod ni Libres, si Quijano gironda sa Carcar police niadtong 2013 pinasikad sa usa ka search warrant nga giluwatan sa korte.
Dunay nakuhang illegal drugs sa iyang balay sa Tuyom, apan siya nakaeskapo.
Nalutsan si Quijano og warrant of arrest ug nasikop sa Enero 2014 hinungdan sa iyang pagkapriso sa CPDRC.
Sulod sa pasilidad, iyang nahimamat si Salazar.
Matod ni Libres, ilang nasuta nga si Salazar ang sinaligan ni Quijano sa pagpalusot sa illegal nga drugas sa Dakbayan sa Carcar.
Nakagawas ang duha sa prisohan pinaagi sa plea bargaining agreement, apan nagpadayon sila si Quijano ug Salazar sa ilang illegal nga negusyo.
Samtang si Police Lieutenant Colonel Benedick Pobleta, pangu sa RDEU 7, nihulagway kang Quijano nga regional high value individual tungod sa nasakmit nga drugas.
Matod ni Poblete nga kon wala napakgang ang usa ka kilo nga gidaghanon sa shabu mamahimong pang New Year unta kini sa mga drug user.
Nanghimakak si Quijano nga siya ang tinubdan sa illegal drugs sa Carcar.
Matod niya nga tighagbong lang siya sa drugas. (BBT)