Patay ang kanhi pari ug nailang kanhi lider ug negotiator sa Communist Party of the Philippines human pusila sa makadaghan sa wa pa mailhing gunman alas 8:20 sa gabii sa Biyernes, Mayo 28, 2021 sa Purok Caimeto, Barangay Upper Poblacion, lungsod sa Pilar, mga Isla sa Camotes, Sugbo.
Si Rustico Luna Tan, 80, minyo, namatay diha-diha human nakaangkog samad pinusilan sa nawong, liog ug uban pang bahin sa lawas.
Si Police Lt. Renerio Mejeas, hepe sa Pilar Police Station nga nahinabi sa Superbalita Cebu, nagkanayon nga si Tan nag-inurasa sa iyang balay nga way koral nga daplin sa karsada, natulog sa duyan nga nahimutang sa terrace.
Ang mga silingan ningbutyag nga sila nakadungog og sunod-sunod nga mga buto sa pusil.
Ilang nabantayan nga human sa mga buto, dunay tawo nga nagmotorsiklo nga daling nipalayo, apan way bisan usa nakakita sa gunman.
Sa ilang pagsusi, si Tan diha sa duyan ug dunay daghang mga samad pinusilan sa lawas.
Matod ni Mejeas nga ilang gipaabot ang kabanay ni Tan aron makakuha silag dugang mga impormasyon, gawas sa ilang nakuhang background niini.
Tanang anggulo ilang gisubay karon, apan giklaro ni Mejeas nga wa kaayo siya makaila kang Tan kay bag-o pa siyang nahimong hepe sa kapulisan sa lungsod.
Sa ilang pagsukitsukti sa mga silingan, maayong tawo si Tan.
Si Kapitan Rodrigo Heramis sa Barangay Upper Poblacion nga nahinabi sa dySS Super Radyo nagkanayon wa siyay nabantayan nga kadudahan ang panglihok sa kanhi pari.
Giangkon niya nga nakaila siya kang Tan nga kanhi aktibo sa walhong pundok.
Nagkaestorya sab sila niini dihang iyang gibisita niya kay dunay daghnag mga menor nga diha sa balay ni Tan.
Nitug-an kini kaniya nga iyaha lang gitudluan ang mga batan-on sa pagpananom.
“Ako gisusi kay naila ni siya nga naa sa wa, pikas pero nakita nako nag-gardening ra man, unya wala koy nakita nga laing kalihukan,” dugang ni Heramis.
Wa sab kini mobiya sa ilang lugar sukad niadtong Enero ning tuiga.
Bisan sa pangidaron, magmotorsiklo kini nga mosuroy sa mga barangay.
Nahibaw-an nila nga duna kini duha ka mga anak sa iyang asawa.