PATAY ang usa ka kanhi pulis human pusila sa riding-in-tandem sa Sityo Bliss, Barangay Labangon, Dakbayan sa Sugbo, pasado alas 3:00 sa hapon sa Enero 25, 2021.
Ang dapit sa krimen pipila lang ka lakang ang gilay-on gikan sa Labangon Police Station-10 ug duol sa ancestral house sa namatay, si Police Corporal Rodel Demaangay, 40.
Si Demaangay nadestino sa Autonomous Region in Muslim Mindanao (ARMM) apan gitaktak sa Camp Crame sa serbisyo niadtong Hunyo 25, 2020 tungod sa three counts of grave misconduct.
Si Demaangay lumad nga taga Bliss sa Labangon apan didto na kini nanimuyo sa Sityo Nalsobe sa susamang barangay. Ang Sityo Nalsobe sudlonon nga bahin sa Labangon samtang maagian lang ang lugar kon diin siya gibanhigan.
Sa impormasyon nga nakuha ni Si Police Master Sergeant Stephen Sefuesca sa Labangon Police Station 10, si Demaangay naglingkod sa bangko atubangan sa iyang motorsiklo, atbang sa ilang balay.Matod ni Sefuesca, duha ka mga lalake nga nagsakay og motorsiklo ang kalit nga mihunong sa atubangan ni Demaangay dayon sa pagpamusil.
Si Dimaangay nakaangkon og daghang samad pinusilan sa iyang lawas ug ulo ug namatay dayon.
Gituohan usab nga si Demaangay wala na kini nakapabuto sa iyang armas ngadto na sa mga mamuno.
Ang Scene of Crime Operatives (Soco) dunay narekober nga 30 nga mga bala sa crime scene kon 22 niini pulos mga kabhang sa bala nga gituohang kalibre 45 ug kalibre sa 9mm.
“Dili pa gyud nato ma-determine kon mao ba gyud na nga bala kay iproseso pa man na sa Soco ang pagsusi pinaagi sa pag-examine kon unsa gyud nga bala. But initial mao nay narekober sa atong Soco,” matod ni Sefuesca.
Giangkon usab ni Sefuesca nga sa kasamtangan wala pa silay giya sa anggulo sa motibo sa pagpatay kang Dimaangay apan ilang tan-awon kon kini kabahin ba sa iyang personal nga kinabuhi o kabahin sa iyang trabaho isip usa ka sakop sa kapulisan.
“Kabalo man gyud mi nga sa amo nga pulis. Sa among trabaho posibleng duna ba kaha naglagot namo tungod sa among trabaho, Mao na nga usa na sa among hatagan og pagtagad sa pagpatay sa biktiima,” dugang ni Sefuesca.
Subay sa pakighinabi ngadto na sa iyang asawa nga si Venus, ang iyang bana kanhi nabutang sa Special Weapon and Tactics (Swat) sa Cebu City Police Office (CCPO) hangtod nga nabalhin didto sa ARMM.
“Ang asawa dili pa gyud nato ma estorya ug tarong kay kasabot ta nga na shock pa sa panghitabo mao nang wala pa nato makuha kon anus-a ni siya na-assign didto sa ARMM,” butyag ni Sefuesca.