Sa unang 15 ka oras pa lang sa “Pagpupugay” sa Sabado, Enero 7, 2023, kapin sa 6,000 ka mga deboto ang naglinya sa Quirino Grandstand sa Manila alang sa kahigayonan nga maduol sa imahen sa Black Nazarene.
Sa datus gikan sa Quiapo Church Command Post, nagpakita nga kapin sa 6,000 ka mga deboto ang naglinya sa Quirino Grandstand, diin nahimutang ang imahen, sukad nagsugod ang Pagpupugay ala 1 sa kaadlawon niadtong Sabado, Enero 7.
“Ang crowd estimate sa Luneta (Quirino Grandstand) kay 6,245, base sa alas 4 p.m.,” sumala sa nahatag sa kadagkoan sa Quiapo Church.
Ang Pagpupugay gipaila sa panahon sa pandemiya sa Covid-19, diin ang mga deboto gitugotan lamang sa pagwagayway ug pagsimba sa Black Nazarene gikan sa layo.
Gipulihan niini ang tradisyonal nga “Pahalik,” diin ang mga deboto gitugotan sa paghikap, pagpahid sa panapton ug paghalok sa imahen.
Alang sa selebrasyon karong tuiga, gitugotan na ang mga deboto sa pagpaduol sa imahen, paghikap niini, pagpahid niini og panapton, apan dili paghalok niini.
Nagsugod ang “Pagpupugay” mga ala 1:00 sa kaadlawon niadtong Sabado human sa Misa sa tungang gabii nga gipahigayon sa Quirino Grandstand ug magpadayon hangtod sa Lunes, Enero 9, 2023.
Apan gawas sa kapin sa 6,000 ka mga deboto sa Quirino Grandstand, ang Quiapo Church nidawat usab sa dul-an sa 25,000 ka mga matuohon.
“Ang crowd estimate sa Quiapo Church... 24,863, as of 5 p.m.,” sumala sa Quiapo Church Command Post.
Ubay-ubay usab nga misa ang gipahigayon sa Quiapo Church sukad alas 5:00 sa buntag. (HDT, SunStar Philippines)