Ang Philippine Institute of Volcanology and Seismology (Phivolcs) nitala og 1,071 ka aftershocks human sa magnitude 7 nga linog sa lalawigan sa Abra niadtong Miyerkules, Hulyo 27, 2022
Ang aftershocks dunay gikusgon gikan sa 1.5 ngadto sa 5.
Ang Department of the Interior and Local Government (DILG) niawhag sa local chief executives (LCEs) sa northern Luzon sa pag-monitor sa ilang dapit bahin sa aftershocks ug samang hitabo nga dakong hulga sa kaluwasan sa katawhan.
“LGUs in the hard hit areas of Ilocos Region, Cagayan Valley and the Cordillera Administrative Region are on top of the situation and will continue to respond to the needs of our citizens,” matod ni DILG Secretary Benjamin Abalos Jr.
Sa sayo pa, si Phivolcs Director Renato Solidum niawhag sa publiko sa paglikay sa landslide-prone areas aron pagpanagang sa resulta sa aftershocks nga gipaabot pipila ka adlaw human sa linog.
Ang National Disaster Risk Reduction and Management Council (NDRRMC) nagkanayon nga P48.3 million nga kantidad sa infrastructure lakip sa kadalanan, taytayan, mga tunghaan ug government ug private facilities ang nadaut sa Regions 1 (Ilocos), 3 (Central Luzon), Cordillera Administrative Region (CAR) ug National Capital Region (NCR).
Ang naapektohan nga kabalayan nikabat og 1,583, diin 1,535 ang nadaut ug 48 ang naguba.
Unom ka mga tawo ang namatay tungod sa linog, samtang upat o daghan pa ang gikataho nga missing ug angol.
TAHO SA DEPED
Ang Department of Education (DepEd) nagkanayon nga daghang tunghaan ang nadaut sa linog sa Abra nga niabot og 164.
Sumala sa DepEd, dunay kinatibuk-ang 9,539 ka tunghaan sa 58 ka divisions ang apektado ug ang upat gigamit nga evacuation centers sa mga molupyo.
Dugang sa ahensiya, P228.5 million ang gikinahanglan sa pag-ayo sa mga tunghaan labi na sa Cordillera ug Ilocos provinces.
Ang DepEd nilatid sa pag-abli sa School Year 2022-2023 sa Agusto 22.
Si DepEd spokesperson Michael Poa nagkanayon nga tukion pa sa ahensiya bahin sa pagsugod sa klase sa apektadong dapit sa linog. (SunStar Philippines)