Gitangtang sa Commission on Elections (Comelec) sa voter’s registration sa lalawigan sa Sugbo ang kapin sa 20,000 ka mga botante samtang nagsingabot ang Barangay ug Sangguniang Kabataan Elections (BSKE) sa Oktubre 30, 2023.
Sa datus gikan sa Comelec7 ngadto sa SunStar Cebu sa Lunes, Hulyo 10, 2023, mokabat sa 20,633 ka mga botante ang natangtang.
Kadaghanan sa mga natangtang nga rehistrasyon mao ang mga botante nga nibalhin sa laing siyudad o munisipyo nga mikabat sa 9,172 ka mga botante.
Gitangtang usab sa listahan ang mga botante nga adunay duha o daghan pang fingerprints nga na-detect sa Automated Fingerprint Identification System (AFIS) nga niabot sa 6,215 ka mga botante.
Samtang, 5,231 ka kompirmadong namatay nga mga botante ug 15 ka mga botante nga adunay multiple o double records sa siyudad o munisipyo gi-delist usab.
Niini, niabot sa 3,384,185 ang gidaghanon sa mga botante sa BSKE 2023 sa lalawigan sa Sugbo.
Hinuon, gipasabot sa Comelec 7 nga posibleng mausab ang maong mga numero tungod sa nagpadayong proseso sa evaluation sa listahan.
Samtang base sa pamahayag sa Comelec National, adunay dul-an sa 400,000 ka mga rekord sa rehistrasyon ang natangtang human sa Hunyo 19 nga Special Election Registration Board (SERB) hearing.
“As of 7 July 2023, latest data show that 381,906 voter registration records nationwide have been deleted or abated,” sumala sa Comelec.
Susama ang hinungdan sa nahisgotan sa taas.
Kahinumdoman, ang Comelec nagtinguha nga ipagawas ang certified ug final computerized voters’ lists para sa BSKE sa Agusto 1, 2023. (Chrys Chelsea Bernales, UP Cebu Intern, RRM)