KON kaniadto makita ang mga tarpaulin nga gimontar diha sa mga koral sa Kapitolyo agig pagtabon sa construction site sa Resource Center Project, karon gipanangtang na kini ug dayag nang makita ang luna.
Klaro na sa publiko ang kalawom sa excavation work sa WT Construction Incorporated sa mao nga dapit.
Subay sa iyang kamanduan nga undangon ang pagtrabaho sa proyekto, gihimug-atan hinuon ni Gobernbador Gwendolyn Garcia nga dili mahimong pasagdan ang luna nga iya sa Kapitolyo ug anaa sulod sa Capitol compound.
Giklaro hinuon niya nga di mogasto ang Kapitolyo alang sa pagbalik sa luna sa naandan nga hitsura o kahimtang niini.
“Dili sad pwede nga ang Probinsiya maoy mogasto. Pagastuhon ang nakasala niana kay wa man ko moingon nga kawta na,” padayag ni Garcia.
Atol sa unang adlaw sa trabaho ni Garcia niadtong Lunes, personal niyang gisusi ang construction site.
Niisyu usab siya og executive order nga nagmando sa WT Construction nga hunongon na ang tanang matang sa trabaho.
Wala direktang gitumbok ni Garcia ang kontraktor isip iyang tahasan pagpabalik sa naandan nga hitsura o kahimtang sa luna.
“Despite my warning after I was proclaimed already as the newly elected and incoming governor, gipadayunan man og kutkot. So, dili na sala? Kamo na la’y determine kinsay nakasala. Kinsa may nipadayon og kutkot?” nangutana si Garcia.
Mobalor og P1.3 billion ang tukoron unta nga Cebu Resource Center nga una nang gihulagway ni Garcia nga di makahatag og benipesyo sa Sugbo ug sa mga Sugbuanon.