Kapitolyo mougmad sa relocation site sa illegal settlers sa UP Cebu campus

Hulagway kuha sa UP Cebu website
Hulagway kuha sa UP Cebu website

Makatukod na unya og dugang school buildings ang University of the Philippines (UP) Cebu sa ilang luna sa Barangay Lahug, dakbayan sa Sugbo sa higayon nga mabalhin na sa ilang relocation site ang kapin 100 ka illegal settlers nga nag-okupar sa propiyedad sa unibersidad.

Kini human nagkasabot ang Cebu Provincial Capitol ug UP Cebu sa ilang prinsipyo alang sa “mutual revocation” sa deed of donation sa duha ka mga ektarya nga yuta nga nahimutang sa Barangay Busay, dakbayan sa Sugbo.

Ang luna nga gi-donate sa Kapitolyo niadtong 2016 atol sa administrasyon ni kanhi gobernador ug karon Bise Gobernador Hilario Davide III, magsilbi gihapon sa orihinal nga katuyoan niini isip relocation site sa mga illegal settler sa propiyedad sa UP Cebu sa Lahug.

Atol sa tigom sa Kapitolyo niadtong Miyerkules, Marso 1, 2023, nga nigawas sa Sugbo News, si UP Cebu Chancellor Atty. Leo Malagar nisulti kang Gobernador Gwen Garcia nga gusto sa unibersidad nga mohimo og physical improvements sa campus, apan nalimitahan sila sa ilang mga plano tungod sa presensya sa illegal settlers.

Matud niya nga dili nila mahimo nga mapabalhin ang mga illegal settler ngadto sa Busay, ang luna nga gidonar sa Kapitolyo isip relocation site, kay wa pa ma-develop ang maong property.

Kulang kini sa mahinungdanong mga imprastraktura sama sa road network, kuryente ug suplay sa tubig ug uban pang linya sa utility.

Ang gobernador niingon nga andam ang Kapitolyo sa pag-develop sa relocation site sa Busay kon magkauyon ang UP Cebu ug Kapitolyo nga i-revoke ang donasyon sa yuta— usa ka sugyot nga gihangyo ni Malagar .

Dili lang ang UP Cebu makalingkawas sa mga obligasyon sa pagpalambo sa site, apan makapadali usab kini sa ilang mga plano sa pagtukod sa campus sa Lahug.

Ang UP-Cebu anaa nahimutang sa 14 ektarya nga luna sa barangay Lahug nga gi-donate sa Kapitolyo niadtong 1963 atol sa administrasyon ni kanhi gobernador Francisco Remotigue.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph