Kapulisan blangko pa sa pagpangrakrak sa San Fernando

Tampo sa San Fernando Police
Tampo sa San Fernando Police

WA PAY naestablisar nga motibo ang kapulisan sa lungsod sa San Fernando sa pagpangrakrak sa mga alas 12 sa tungang gabii sa Dominggo sa sityo Baysa, Barangay Panadtaran, San Fernando, habagatang Sugbo.

Si Police Major Efren de la Cruz Diaz, hepe sa San Fernando Police Station, niingon nga di pa sab sila makasulti kon duna bay kalambigitan sa eleksiyon ang pagpangrakrak.

Wa pa sab silay matumbok nga mga suspek.

“Nega pa for the suspects and victims,” matod ni Diaz sa interbyu sa mga tigbalita sa Lunes, Mayo 9, 2022.

Sila si Diaz ug iyang mga sakop ningresponde sa alarma sa mga buto sa pusil sa nahisgutang dapit.

Sa ilang imbestigasiyon, dunay tulo ka mga sports utility vehicle (SUV) nga nangabot sa dapit sa wa pa ang pagpamusil.

Paglabay sa pipila ka minutos, duna dayoy nadungog nga mga buto sa armas ang mga lumolupyo.

Ilang nakita nga nanggawas ang mga sakay sa tulo ka mga sakyanan ug nag-iyahay sa pagpanagan sa nagkadaiyang mga direksiyon.

Matod ni Diaz nga sa ilang pag-abot sa dapit, duha na lang ka mga sakyanan ang ilang naabtan nga gilangkuban sa puti nga Nissan Navara (GCS 1894) ug itom nga Toyota Fortuner (3493).

Ang Fortuner dunay daghang mga buslot agi sa pinusilan.

Wa na silay naabtan bisan usa sa mga sakay sa duha ka mga sakyanan.

Sa Lunes sa buntag, wa pay bisan usa ka tawo nga nangangkon nga iyaha ang mao nga mga sakyanan nga gikustodiya sa kapulisan.

Niadtong 2019 elections, ang lungsod giklasipikar sa Commission on Elections (Comelec) nga election hotspot human sa sunodsunod nga pagpamatay sa mga opisiyal sa lungsod, usa niini ang barangay kapitan nga bana ni incumbent re-electionist Lakambini “Neneth” Reluya sa Enero sa mao nga tuig.

Nakalingkawas ang mayor sa kamatayon human sa ambush sa dakbayan sa Talisay, apan ang iyang bana nga si Ricardo namatay, uban sa laing duha nila ka mga sakop.

Tungod sa mga hitabo, daghang mga magtutudlo ang ningdumili sa pagserbisiyo isip electoral boards atol sa eleksiyon.

Mga sundawo ug kapulisan gipakatap sa San Fernando isip dugang seguridad sa 2019 elections.

Karong tuiga, ang Comelec niila sa San Fernando nga usa sa pito ka mga dapit sa lalawigan sa Sugbo nga “areas of concern.” (BBT/REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph