Alerto na ang Police Regional Office 7 tungod sa nag singabot nga bagyong Auring, diin usa ang Sugbo sa maapektohan ilabi na ang amihanang bahin.
Si Police Brigadier General Ronnie Montejo, direktor sa Police Regional Office (PRO) 7 nimando sa iyang personnel nga mo standby sa tanang police stations ug andamon ang ilang mga search and rescue equipment.
Matod ni Police Colonel Aladdin Collado, hepe sa kapulisan sa probinsya sa Sugbo, nga iya na usab nga gipaandam ang iyang mga sakop lakip na ang ilang pagpakig alayon sa crisis response section sa Regional Mobile Force Battalion aron maabagan sila sa pag deploy sa norte sa lalawigan sa Sugbo.
“We already alerted the most of the towns in the northern part of Cebu and in fact the whole province,” matod ni Collado.
Dugang ni Collado nga iya usab nga gimandoan ang mga hepe sa matag police station nga mohimo og recorida aron pahimangnoan ang mga namuyo sa daplin sa kabaybayonan nga magbantay tungod sa pagsugod nag dako sa bawod.
Kon gikinahanglan nga pabakwiton sa labing luwas nga dapit ang mga lumolupyo ila kining buhaton pinaagi sa pakig alayon sa local Disaster Risk Reduction and Management Office sa matag lungsod.
“Kasama yan sa directives ko sa operation officer ko na magkaroon ng recorida and if there’s a reason na magkaroon ng evacuation, and we will do that,” dugang ni Collado.
Nasinati nag sugod ang kusog nga hangin sa amihanang bahin sa probinsya sa Sugbo nga miresulta sa dagkong bawod nga mohapak sa baybayon.
Gipahimangnoan usab ang mga mananagat nga dili lang una mo risgo sa pag lawig. (AYB)