Nananom na usab og kahoy ug mga bungang kahoy ang kapulisan sa siyudad sa Sugbo, Martes sa buntag, Marso, 9, 2021.
Ang kapulisan nga gipangulohan ni Police Colonel Josefino Ligan, hepe sa CCPO, sa kalihukan nga gipahigayon sa Barangay Cambinocot ,bukirang dapit sa dakbayan sa Sugbo.
Kabahin na usab kini sa tinguha nga makatanom ang kapulisan lukop nasud og 20 milyones ka punoan sa kahoy ug mga prutas sulod sa termino ni PNP Chief Police General Debold Sinas.
Matod ni Ligan nga sa 1,200 ka mga personnel sa CCPO, kinahanglan ang matag usa kanila makatanom og duha ka punoan sa kahoy. Karon sobra na sila sa katunga sa ilang target.
Pasabot niya nga ang kapulisan di lang manakop sa mga kriminal ug mopatunhay sa kahusay ug kalinaw, mopangga usab sila sa kinaiyahan.
“Kining pagtanom nato sa mga kahoy para ra man ni sa umaabot nga henerasyon nga naa pud silay maabtan nga nindot nga kinaiyahan, naay mga tanom, presko ang hangin,” matod ni Ligan.
Si Kapitan Reynald Lauron sa Barangay Cambinocot mapasalamaton sa kapulisan sa Siyudad sa Sugbo nga ang iyang dapit napilian nga maoy tamnan sa gatusan ka punoan sa kahoy ug mga prutas. (AYB)