HEPE sa kapulisan sa Siyudad sa Sugbo mohangyo sa bag-ong napili nga mayor sa dakbayan nga hatagan og kaugalingong luna ang mga police station human masuta nga siyam sa 11 ka police stations mga squatter lang.
Motambong ang tanang chief of police sa Cebu City Police Office sa ipatawag unya nga command conference ni Mayor-elect Edgardo Labella inig lingkod na niini sa katungdanan sa Hunyo 30.
Una nang nipahibawo si Labella nga mo reach out siya sa kapulisan sa dakbayan aron padayon ang ilang maayong relasyon.
Maminaw siya sa mga plano sa Cebu City Police Office.
Gitinguha ni CCPO Director Police Colonel Royina Garma nga mahatagan nag kaugalingong luna ang mga police station sa Siyudad sa Sugbo human masuta nga nag-ukopar sila sa di ilang building.
Matod ni Garma nga ang building ug luna nga gipanag-iya sa Philippine National Police (PNP) ug aduna nay titulo mao ra ang Abellana Police Station ug Guadalupe Police Station nga tukuronon pa sa sunod buwan.
Aduna na untay gidonar ang Barangay Inayawan alang sa station 7, apan nalangay tungod sa pagbabag sa mihulip nga kapitan nga si manlalaban Kirk Bryan Repollo.
Tungod niini, ang Pardo police station nag antos sa building nga iya sa barangay mao nga di mapalambo.
Ang mga police station nga hangtod karon di pa iyaha sa PNP ang mga luna mao ang Waterfront police station, Parian, Pardo, Mambaling, Labangon, Carbon, Mabolo, Sawang Calero ug Talamban.
Gitug-an ni Garma nga ang maong mga police stations naglisod sa pagpa renovate niini o pagpatukod og bag-ong building tungod kay estrikto ang PNP kon di idonar ngadto sa organisasyon ang luna.
Gawas sa mga luna nga ilang ihangyo kang Labella, lakip sa ilang gitinguha nga mahatagan silag motorsiklo.
Aduna nay mga patrol cars ang CCPO nga gigamit sa ilang pagtubag sa mga alarma, apan tungod sa problema sa trapiko, nagkinahanglan silag mga motorsiklo. (AYB)