GAWAS nga daan na nga naka-full alert status ang kapulisan sukad pa niadtong Lunes, Marso 25, tungod sa ika-50 nga anibersaryo sa New People’s Army (NPA) sa karong adlawa, Marso 29, dugang pagpahugot pa sa seguridad usab ang gipatuman sa Mandaue City Police Office (MCPO) tungod sa pormal nga pagsugod na sa lokal nga pagpangampanyasa eleksiyon.
Matud ni Police Col. Julian Entoma, direktor sa MCPO, nga aduna na sayo ning semanaha pa lang nakadawat na sila og sulat pagpahibalo alang sa ipahigayon nga political rally sa hawanan sa Bai Hotel sa North Reclamation area karong hapon hangtud na sa gabii, Marso 29.
Kini usa ka paagi alang sa opening salvo sa pagpangampanya, ang maong nagpahibalo sa kapulisan ug aduna nay permit ang kampo ni 6th district representative Jonas Cortes.
Gitug-an ni Atty. Jamaal Calipayan, chief of staff ni Cortes, nga alas 8:00 karong gabii, magsugod ang opening salvo, diin 20 mil ka mga tawo ang ilang gilantawan nga mosalmot.
Samtang sa habig sa kampo nila ni Mandaue City Mayor Luigi Quisumbing, wala silay ipahigayon nga dakong political rally, atol sa pagsugod local campaign.
Gitug-an li Quisumbing padayon lang sila sa ginabuhat na nila su’d sa pipila ka bulan ang sorties kon pulong-pulong diha sa kabarangayan.
Hangyo lang ni Entoma sa mga lokal nga kandidato ilabi na sa mga suporter niini nga likayan ang ang pagbugal-bugal sa matag kampo, aron kalikayan ang pag-initay sa ulo nga moresulta sa kagubot. (FMD)