Mokabat sa 214 ka mga polis gikan sa Mandaue City Police Office (MCPO) posibleng ipakatap sa Negros Oriental isip kabahin sa paghulip sa tibuok tropa sa Negros Oriental Police Provincial Office (NOPPO).
Nakita ang deployment nunot sa mandato sa Philippine National Police (PNP) sa pag-reshuffling sa mga police personnel sa probinsiya human sa pagpatay kang Negros Oriental Governor Roel Degamo ug walo ka mga sibilyan.
Si Police Lieutenant Colonel Franco Rodulf Oriol, deputy city director for operations ug spokesperson sa MCPO, niingon sa usa ka press conference sa Miyerkules, Marso 8, 2023, nga nagpaabot sila karon sa direktiba gikan sa Police Regional Office (PRO 7) ug mga ngalan sa mga personahe alang sa deployment.
Matod ni Oriol nga gawas sa MCPO, aduna usay 560 ka personnel sa Cebu Police Provincial Office (CPPO), 340 sa Cebu City Police Office (CCPO), 220 sa Lapu-Lapu City Police Office (LCPO), ug 340 ka mga pulis sa Bohol Provincial Police Office (BPPO) nga ibalhin.
Ilang hulipan ang gibanabanang 1,709 ka mga polis sa NOPPO. Ang MCPO adunay dul-an sa 600 ka police personnel.
Matod ni Oriol nga ang tibuok puwersa sa NOPPO ipang-apud-apod sa tanang buhatan sa kapulisan sa Central Visayas, apan matod niya nga alang sa MCPO, wala pa silay mga ngan sa kapulisan sa Negros nga madestino sa ilang buhatan.
Siya niingon nga ang bag-ong tropa sa NOPPO adunay labing menos tulo ka mga lieutenant colonels, usa ka police major, lima ka police captains, ug upat ka lieutenants ug uban pa.